CEBU, Philippines - Patay na nga napalgan kagahapon sa hapon diha duol sa iyang payag sa sitio Butong, barangay Uling, usa sa mga bukirang barangay sa dakbayan sa Naga ang usa ka mag-uuma kinsa nakaangkon og usa ka samad dinunggaban sa iyang tiyan. Si Rey Mantalaba sa Naga Emergency Assistance Team (NEAT) kinsa usa sa miresponde sa hitabo nga nahinabi sa Banat News miila sa biktima nga si Teofilo De Gracia, 67-anyos residente sa maong barangay.
Matud ni Mantalaba nga ang asawa ni De Gracia nga si Cristitota De Gracia mibutyag nga niadtong Biyernes pa sa udto nawala ang iyang bana hinungdan nga ilaha kining gipangita. Ang pamilya sa biktima miadto sa payag niini diin nahimutang usab sa duol ang ilang ulingan kapin usa ka kilometro gikan sa ilang balay.
Ang pamilya sa biktima nangayo kini og panabang sa kapitan sa barangay Lanas nga si Rey Arnusa ug sa kapitan sa Uling nga si Josie Dakay.
Ang duha ka kapitan mitangas dayon ngadto sa lugar ug mga alas 6:00 sa hapon kagahapon napalgan ang patay’ng lawas ni De Gracia nga nagbuy-od diha sa kasagbutan 20-metros ang gilay-on gikan sa payag nga naligo na sa kaugalingong dugo.
Gituohan sa mga paryente ni De Gracia nga gitulis kini tungod kay ang baka sa biktima nawagtang. Gituohan usab nga si De Gracia misukol sa mga tulisan tungod kay nabantayan diha sulod sa payag nga nangakay-ag na ang mga butang. Si Mantalaba midugang nga gituohan usab nga dili lang usa ka tawo ang mamumuno diin posibleng ang patay’ng lawas sa biktima gidayongan kini ug gibutang sa lugar diin kini napalgan tungod kay walay nabantayan nga ginuroyan.
Ang kapolisan padayon pang nag-imbestigar sa maong kaso. (BANAT NEWS)