CEBU, Philippines - Mipadayag og kabalaka ang magpapatigayon nga si Glenn Anthony Soco sa subli na usab nga paggamit sa Precinct Count Optical Scan (PCOS) machines karong Mayo 13 nga eleksiyon.
Apan bisan pa niini, si Soco uyon gihapon sa paggamit sa PCOS machines bisan pa sa mga sipyat sa niaging eleksiyon sa 2010 diin siya napilde batok ni anhing bise gobernador Gregorio Sanchez Jr.
Nanghinaut si Soco nga natarung na sa Commission on Elections ang mga sipyat nga ilang nasinati aron dili na kini masubli karong umaabot eleksiyon.
Anaa pa sa Korte Suprema hangtud karon ang protesta ni Soco batok ni Sanchez diin iyang gipadayag nga dunay sayop ang transmittal sa resulta sa eleksiyon gamit ang PCOS machines.
Si Soco napilde og 26,237 ka botos ni Sanchez sa pagka-bise gobernador hinungdan sa iyang pagpasaka og protesta sa Comelec aron usbon pag-ihap ang mga balota sa 20 ka mga presinto.
Gibasura na sa Comelec ang iyang petisyon apan iya kining gipasaka ngadto sa Korte Suprema.
Nisugyot hinoon si Soco nga ipakita sa Comelec ngadto sa tanang kandidato ang mga PCOS machines aron masuta kung kini andam na sa umaabot eleksiyon.
“Election is actually the expression of the sovereign of the people. The vote of the people should be protected and the truth should be upheld,†matud pang Soco.
Ang Comelec niangkon nga malampuson ang mock election sa niaging semana lukop nasud bisan dunay gamay nga sipyat sa mga makina ilabi na ang delay sa transmission.
Si Comelec-7 regional director Temie Lambino kinsa maoy speaker sa gipahigayong “Know the Way: Media issues on May Elections†miingon nga daghang ‘security features’ ang mga PCOS machines nga dili basta matikas.
Usa na niini ang paggamit nila og codes sama sa gigamit sa mga money transfers sa mga bangko nga dili basta masulod ug mahilabtan. Giangkon hinuon niyang mahimong malangay ang transmissions sa election returns kung dunay magbinuang og gamit og signal jammers.
Apan bisan pa man niini mao ra gihapong election returns nga gi-transmit ang mo-abot didto sa National Board of Inspectors alang sa final nga resulta.
Gipasalig hinoon sa Comelec nga kung unsa may sipyat atol sa mock election, ila kining matarong sa dili pa ang piniliay sa Mayo. (BANAT NEWS)