CEBU, Philippines - Patay ang duha ka lalaki human sila gidaro sa usa ka sakyanan diha sa may dalan Duterte sa Sitio Banawa sa barangay Guadalupe ning dakbayan pasado alas- 4 sa kaadlawon kagahapon.
Ang namatay mao sila si Rogie Deagbel, 18, molupyo sa Happy Valley ug Renato Delgado, 32, molupyo sa Lutaw-lutaw sa barangay Labangon nga pulos mamasurahay.
Sa pakighinabi sa Banat News ni Rosalie Barbo, kaila sa mga biktima nga mibutyag kini nga sa wala pa mahitabo ang aksidente iyang nakit-an ang duha nga nagsakay sa ilang traysikad.
Matud pa niya gisampit pa niya ang duha aron mamainit apan mibalibad ang duha ug mipadayon sa ilang pagbiya sakay sa ilang traysikad.
Apan wala gani kaayo sila makapalayo kalit nga mibutho ang usa ka naghaguros nga pribadong sakyanan nga diha na magsubay sa kilid sa dalan diin magdagan ang traysikad sa mga biktima ug diretso og bangga niini.
Matud pa ni Barbo nakit-an niya nga nangalagpot ang duha apan inay hunongan aron tabangan misutoy palayo ang maong sakyanan.
Wala makuha ni Barbo ang plaka sa sakyanan tungod kay kusog kaayo kining mipasirit palayo nga daw walay nabanggaan sa kilid sa dalan.
Ang mga habal-habal sa lugar nga diha usab atol sa pagkahitabo miingon nga mismo sila hapit maigo apan walay nakaako kanila paggukod sa maong sakyanan.
Ang inahan ni Deagbel nga si Gina miingon nga gisaligan niya sa ilang panginabuhian ang iyang anak nga namatay ug dako ang iyang pagmahay ngadto sa drayber nga nakapatay sa iyang anak nga wala makonsensiya sa nabuhat niini.
Si Traffic Aid One Donald Rivera sa City Traffic Office Management miingon nga nalagpot si Deagbel og pito ka metros gikan sa traysikad samtang si Delgado nalagpot o naguroy og 16 ka metros gikan sa ilang naguba nga traysikad.
Ang mga awtoridad nangita karon sa usa ka sakyanan nga gituohang usa ka “Nissan†tungod sa natangtang niining logo diha sa nahitaboan. (BANAT NEWS)