Ginang napunggit sa bato patay

CEBU, Philippines - Patay ang usa ka ginang human kini matagaki og dakung bato gikan sa ibabaw’ng bahin sa sitio Tangub, barangay Lagtang, dakbayan sa Talisay nga gikabkab aron palapdan ang dalan padulong sa Toledo City.

Ang biktima giila nga si Letecia Alcoseba, 50, taga barangay Jaclupan Talisay, naangol usab ang kaubang angkas niini nga si Jovy Laborada, 33.

Si Renato Cabradilla, secretary sa barangay Lagtang nga nahinabi sa Banat News mibutyag nga gikan sa barangay Jaclupan paingon unta sa Tabunok ang duha angkas sa habal-habal nga gimaneho sa kapuyo ni Laborada nga si Michael Briones.

Si Laborada diha sa tunga samtang si Alcoseba maoy diha sa ulahi. Si Michael nga nahinabi sa Banat News nagkanayon nga duna siya’y laing pasahero nga giila lang sa ngalan nga “Jason” gibana-banang 20-anyos ang panuigon taga barangay Jaclupan usab apan wala kini maunsa.

Lakip ang motorsiklo ni Michael wala usab maguba  sa maong insidente.

Giingong daghang mga habal-habal ang nagsunod nga miagi diha sa lugar apan ang naatlan gyud  ang biktima maoy naigo. Sumala pa nga naigo usab sa abaga si Laborada sa maong bato.

Ang duha gidala ngadto sa Talisay City District Hospital apan gibalhin kini ni Konsehal Danny Caballero ngadto sa Chong Hua Hospital.

Ang maong road widening proyekto sa Department of Public Works and Highways ug ang contractor sa proyekto mao ang QM Builder. Ang project manager sa QM Builder nga si Willy Abatayo nga nahinabi sa Banat News kagahapon sa hapon nagkanayon nga pag-abot sa tambalanan gitabang pa si Alcoseba apan nakabsan gyud kini sa iyang kinabuhi.

Ang QM Builder maoy miabaga sa tanang galastohan sa mga biktima. Matud ni Abatayo ang bato nga nakaigo sa biktima dili gikan sa ilang gikubkob kay gilumotan naman kini ug ang bato naggikan kinse metros sa gikahimutangan sa ilang backhoe.

Si Marc Ferdinand Bas kapitan sa Lagtang nagkanayon nga naghuwat siya sa resulta sa imbestigasyon sa DPWH kabahin sa hitabo.  (BANAT NEWS)