CEBU, Philippines - Patay na nga giugkat sa mga mananagat ang usa ka mag-uuma nga gituohang giatake sa rabis ug nalisoan sa maayong pangisip human mapaaki og iro ug miambak kini sa dagat sa pantalan sa barangay Taloot, lungsod sa Argao kagahapon sa alas 6:30 sa buntag.
Ang biktima mao si Diosdado Mamac, 49, minyo, taga barangay Bogo, Argao ug usa ka mag-uuma.
Si SPO4 Esteban Albuera, Deputy chief sa Argao Police Station mitug-an sa Banat News ang mga mananagat duol sa pantalan nga giambakan sa biktima maoy nakamatikod nga wala na kini motunga human kini magkapa-kapa sa dagat nga iyang giambakan.
Gumikan sa ilang kabalaka, ila kining gisusi ug maoy ilang nadiskobrehan nga mihutlay na kini ug wala na maginhawa.
Ila kining gisakwat ngadto sa daplin ug gihatud n alang nila sa punerarya sa maong lungsod.
Sa pagsukitsukit sa kapolisan kang Josephine, nga asawa sa biktima kini mitug-an nga napaakan og iro ang biktima ug nalandig kini sa Vicente Sotto Memorial Medical Center sa dakbayan sa Sugbo human kini hilanti gumikan sa pinaakan ug bag-o pa usab kining nakagawas sa tambalanan.
Midugang si Josephine nga ilang namatikdan nga nerbyuso na kaayo ang biktima ug wala na kini sa maayong panghunahuna hangtud nga kalit lang kining milakaw niadtong Lunes sa buntag ug wala na mahibalik.
Nakurat na lang ang asawa human masayri nga patay na ang iyang bana kagahapon sa buntag.
Ang asawa mitug-an nga dili kaantigo molangoy ang biktima nga maoy gituohang usa sa hinungdan sa pagkalumos niini.
Apan ang ubang tigpaniid nagkanayon nga malagmit giataki sa rabis sa iro nga nakapaak sa biktima nga maoy hinungdan sa pagkalibog sa hunahuna niini hangtud nga nawad-an na sa maayong eskuylahan.
Samtang sa laing bahin, usa ka estudyante sa Tejero Elementary School napalgan usab nga patay na human malumos sa dagat dapit sa South Road Properties (SRP) kagahapon sa hapon.
Ang biktima nga nagpangidaron og 15 anyos nagtungha sa Grade 4 sa maong eskuylahan.
Sa imbistigasiyon sa kapolisan nasayran nga ang biktima ug ang mga higala niini nagkuyog nga nangaligo sa dagat sa maong lugar.
Apan sa tanto nilang langoy-langoy nasuta nila nga nawagtang na ang biktima hinungdan nga nangayo sila og tabang sa mga sakop sa Bantay Dagat nga nadestino sa maong lugar.
Ang Bantay Dagat nga misawom ug mianinaw sa ilawom sa dagat maoy misakwat sa biktima nga wala nay kinabuhi.
Padayon pang gisuta sa kapolisan kun mi-eskuyla ba ang maong tinun-an sa wala pa kini malumos. (BANAT NEWS)