Manag-inahan angol sa sunog sa Hipodromo

CEBU, Philippines - Duha ka mga tawo ang nangaangol sa nahitabong sunog sa barangay Hipodromo human miulbo ang sunog nga milamoy sa duha ka balay pasado alas-3 sa kaadlawon kagahapon.

Ang sunog gikatahong diha nagsugod sa balay ni Jessie Codillero, 67, molupyo sa maong lugar ug milamoy usab kini sa katupad nga balay gipanag-iya usab ni Sylvester Parado.

Samtang angol usab ang mag-inahan nga silang Jennifer Malazarte, 39, ug anak niining si Shena, 15-anyos.  Ang bata maoy nagrabehan sa duha. Sa pakighinabi ni Codillero, iyang gisaysay nga iyang namat-an ang kainit sa ilang dapit ug sa iyang pagbangon ug gisusi sa silong  sa ilang panimalay dako na ang kalayo.

Matud pa ni Codillero nga ang iyang anak nga si Jennifer mi-ambak gikan sa ilang terrace nga nahimutang sa taas nga bahin sa ilang panimalay uban ang iyang apo hinungdan nga naangol kini.

Samtang si Cebu City Fire Marshall William Tacaldo, mibutyag usab nga ilang nakontrolar ang sunog niana nang pagka alas 4:12 sa kaadlawon ug iya kini nga giisa ngadto na sa general alarm.

Matud pa ni Tacaldo nga posibleng faulty electrical wirings ang hinungdan sa maong sunog base usab sa gibutyag ni Codillero kaniya.

Apan gipasabot ni Tacaldo nga mohimo pa usab sila og halawom nga imbestigasyon sa maong sunog.

Gibana-banang mokabat sa kapin kun kulang tunga sa milyon ang danyos sa maong sunog.  Susama sa naandan, ang kahagip-ot sa lugar mao gihapoy nahimamat sa kabomberohan.

“Gamay nga lugar, considering dagko atong firetrucks unya maglisod og maneuver,” matud pa ni Tacaldo.  (BANAT NEWS)