CEBU, Philippines - Gihugopan sa bagang duot sa katawhan ang ikaduhang Silhig Festival sa barangay Paknaan, dakbayan sa Mandaue kagahapon.
May pito ka mga contingent nga gi-cluster sa mga purok sa maong barangay nga maoy naghatag og aligre sa maong pista.
Ila kining gihalad kang Senyor Santo Niño kinsa maoy naghatag kanila og paagi nga mabuhi pinaagi sa pagpanggama og silhig.
Si Sto. Niño usab maoy nag-ayo sa ilang mga sakit ug nanalipod kanila gikan sa mga katalagman.
Alang kanila si Sto. Niño maoy naghatag kanila og bag-ong kinabuhi niadtong mga didto na s a ngilit sa kamatayon apan dihang miampo sila kang Sto. Niño nabuhi busa ang tanan nagpasalamat kang Sto. Niño.
Hinuon kadtong mga namatay ug nakabsan sa kinabuhi bisan kun miampo kang Sto. Niño dili siya si Sto. Niño ang mibugto sa ilang kinabuhi kundili ang Dios.
Busa sa matag unang Domingo sa bulan sa Pebrero, ila kining gigahin alang sa naghatag kanila og kinabuhi nga mao si Sto. Niño.
May usa sa mga mitambong sa maong pista nagkanayon nga di sila moila og Dios kay mao kini tigpatay sa tawo, ug mas maayo si Sto. Niño kay maoy tigbuhi ug mohatag og kinabuhi sa tawo.
Si Barangay Kapitan Malaquias Soco miingon nga maoy iyang tinguha nga ang ilang barangay maila unta isip “silhig capital†dili lang sa dakbayan sa Mandaue kun dili sa tibuok lalawigan sa Sugbo.
Dugang pa ni Soco nga higpit gayod ang ilang pagpangandam sa matag tuig nilang pangilin ni Senyor Santo Niño nga nagsugod pa kaniadto sa gamay pa ang ilang kapilya hangtod karon nga nahimo na nga usa ka parokya.
Nagmalampuson ang mao nilang pagpangandam sa mga kalihokan nga naglakip sa kulturanhon nilang kalihokan sa Silhig Festival.
Dili lang mga molopyo sa barangay Paknaan ang naghugop sa pagsaksi sa pito ka mga contingent nga mipahigayon sa ilang street dancing competition, showdown competition ug ingon man sa “andas†competition.
Gumikan sa maong kalihokan gisirhan ang mga dalan gikan sa alas 12:00 sa udto hangtod sa alas 6:00 sa maong barangay nga maoy gisayawan sa tanang contingent. Ang ganti nga nadawat sa showdown winner mao ang P25,000 alang sa unang ganti, ika-duha, P20,000, ika-tulo, P15,00 ug upat ka consolation nga tag P10,000.
Ang napili nga best in street dancing adunay premyo nga P5,000 ug ang best in “andas†P5,000 usab. (BANAT NEWS)