CEBU, Philippines - Wala makontento ang habig sa mga Koreanong gibanhigan ug kapolisan sa dakbayan sa Lapulapu sa pagbasura sa piskaliya sa maong dakbayan sa kasong gipasaka niini batok sa mga suspetsado.
Matud pa ni Atty. Antonio Bacalso II, abogado sa duha ka Koreanong gibanhigan nga lalisonon kaayo ang resolution ni Asst. City Prosecutor Aida Castillo nga nagbasura sa ilang kaso nga gipasaka batok sa usa ka Koreanong gituhoan nga maoy mastermind kon utok sa maong krimen ug sa mga bodyguard niini.
Miluwat si Fiscal Castillo sa maong resolution niadtong Nobiyembre 24, 2012 nga wala pa makasumiter sa ilang “Reply Affidavit†ang kampo sa mga akusado.
Niadto pang sa Disyembre ikasumiter sa mga hingtungdan an g ilang reply affidavit.
Matud pa ni Atty. Bacalso sa maong resolution, maoy gibasehan ni Fiscal Castillo ang pamahayag nga nalatid sa mga affidavit sa akusado nga wala pa madawat niini ang tubag sa mga akusado.
Lakip sa gibasehan ni Atty. Bacalso sa iyang gisumiter nga “Motion for Reconsideration†(MR) mao ang pagbali-wala sa piskal sa pagtan-aw sa CCTV footage diin nagpakita nga ang mga akusado nga sila si Rodenio Espiritu alyas Boy ug Felix Booc alyas Boy Booc didto sa dapit nga nahitaboan sa krimen nga naggunit ug nagtion sa armas ngadto sa mga suspetsado nga mibanhig sa duha ka mga Koreano.
Nakita usab sa CCTV nga adunay panagkunsabo tali sa mga akusado ug sa mga mibanhig nila ni Lee Dung Gun ug Jong Ha Bok ug gani nakita nga misenyas kini sa mga mamumuno sa pagpahilayo sa maong dapit human sa pagpamanhig, dugang pa ni Bacalso.
Alang kang Bacalso nga mas gihatagan sa piskal og pagtagad ang pamahayag sa mga akusado nga wala sila sa dapit nga nahitaboan sa krimen bisan gipamatud-an na kini sa CCTV footage nga ilang gisumiter isip ebidensiya.
Gumikan niini lakip sa nasagmuyo mao si Lapulapu City Police Office Director P/SSupt. Rey Lyndon Lawas gumikan sa kadaghan na sa mga kaso nga gibasura sa piskaliya sa maong dakbayan gumikan lamang sa teknikalidad ug pagbali-wala sa mga ebidensiya nga ilang isumiter.
Kahinumdoman nga nadawat sa kapolisan ang kopya sa resolution gikan sa piskaliya niadtong Enero 11, 2013 nga nagbasura sa kasong murder batok sa suspetsadong si Kim Jay Hyung alyas Kevin Kim ug sa duha ka bodyguard niini. (Bong Soriano/WC)
Diarrhea sa Talisay ipasusi
Ni Brenda Batuto
Ang city health office sa dakbayan sa Talisay giawhag sa chairman sa committee on health sa konseho sa siyudad nga si Konsehal Choy Aznar.
Ang maong awhag mitumaw human sa report nga dunay mga nabiktima sa suka kalibang sa dakbayan sa Sugbo ug ang usa sa gisuspetsahan niini mao ang pag-inom og tubig diha sa automated tubig machine (ATM) nga nahimutang sa daplin sa kadalanan.
Hinuon giklaro ni Aznar nga wala sila’y nadawat og bisan ang city health office sa siyudad kabahin sa reklamo mga dunay nasakit nga miinom og tubig gikan sa ATM.
Apan matud ni Aznar nga ang sagbot lang nga mga plastik nga sudlan sa mamalit og tubig diha sa ATM maoy iyang nabantayan nga problema tungod kay dunay magpataka lang og labay niini. Gipasabot ni Aznar nga kompara sa mga ice water nga walay kasigurohan diin kuhaa ang tubig niini mas makasiguro pang luwas ang tubig gikan sa ATM tungod kay siguradong mineral water man kini ug barato usab.
Mabantayan karon diha sa daplin sa kadalanan diha sa mga lugar dunay mga ATM ug kasagarang mamalit niini mga estudyante tungod kay barato man kini P1 lang ang imong ihagbong makainom na og mineral water.
Apan matud ni Aznar nga dili na nila huwaton pa nga dunay moreklamong nagkalibanga sa ATM awhagon nila ang city health office sa estrikto pag-monitor sa mga ATM sa siyudad.
Si Aznar midugang nga ang mga water refilling station sa Talisay gipa-monitor usab nila kini apan walay mga report nga dunay nakalapas o wala makatuman sa mga rekisitos ang mga water refilling station sa siyudad. (BANAT NEWS)