CEBU, Philippines - Ang sangang buhatan sa Bureau of Immigration and Deportation (BID) ipahimutang sa usa ka mall sa dakbayan sa Lapulapu ning buwan sa Pebrero.
Kini ang gibutyag ni BID 7 Regional Director Casimero Madarang III sa pakighinabi sa Banat News sa iyang buhatan.
Matud pa ni Madarang nga dako og ikatabang sa mga langyaw sa ilang paghikay sa ilang mga transaksiyon sa BID sa dapit nga duol sa ilang nahimutangan.
Gilaraw kini sa BID tungod kay nasinatian nila nga sa matag adlaw maghuot ang mga langyaw sa ilang mga transaksiyon sa rehiyonal nga buhatan sa BID, matud ni Madarang.
Matud niya nga kadaghanan kanila gikan sa dakbayan sa Mandaue ug Lapulapu ug sa norte nga bahin sa Sugbo.
Gumikan niini ang BID mihimo og lakang sa pagpalapad sa ilang serbisyo ngadto sa ilang mga kliyente pinaagi sa pagbutang og “satellite office†sa dakbayan sa Lapulapu sulod sa Gaisano Capital Mactan.
Ang maong buhatan magserbisyo sa susamang mga transaksiyon nga anaa sa ilang rehiyonal nga buhatan sama sa visa extention ug ang status report bahin sa pagpuyo sa mga lanyaw dinhi sa Sugbo.
Sa Pebrero 15, 2013 gi-target sa BID nga sugdan ang transaksiyon sa maong sangang buhatan alang sa kasayon sa ilang mga kleyente.
Ang pagbutang og BID satellite office maoy proyekto karon sa maong ahensya sa tibuok nasud diin ang Sugbo maoy nag-una sa maong royekto ug pagasundan kini sa ubang dapit. (BANAT NEWS)