CEBU, Philippines - Dako ang tinguha ni Barangay Kapitan Malaquias Soco nga mapalambo pa ang nag-unang panginabuhi nga pagpanggama og silhig nga lanot sa ilang dapit nga ilang nasunod sa ilang mga katigulangan.
Matud pa ni Malaquias nga kini ang hinungdan sa ilang pagmugna sa kooperatiba tinguha nga mailhan ang ilang mga produkto dinhi sa Sugbo ug sa tibuok nasud nga Pilipinhon ug sa tibuok kalibotan.
Kini ang hinungdan matud pa niya nga namugna nila ang Silhig Festival nga karong Domingo alang sa ilang tinuig nga pangilin ni Senyor Santo Niño.
Dugang pa ni Kapitan Soco nga nagsugod lang sa ginagmay nga puhonan ang ilang kooperatiba nga nagdala sa ngalan nga Paknaan Multipurpose Cooperative nga kasamtangang gidumala ni Emilia Mangubat.
Naghinayhinay kini sa pagtubo ngadto na sa P2 milyones nilang pundo nga salapi nga maoy timailhan sa paglambo ning maong kooperatiba nga nakahatag usab og panginabuhi sa pipila nila ka mga molupyo.
Si Mangubat nga nahinabi sa Banat News miingon nga kaniadto wala sila maglisod og mga materyales sa lanot nga buli kay daghan man niini kaniadto ang barangay Paknaan ug ang sikbit nila nga barangay Labagon.
Apan karong gipamutol na ang mga punoan sa buli sa ilang lugar naglisud na sila sa pagpangita og mga material alang sa produkto nila nga silhig.
Ang hinungdan sa pagpuo sa mga dagkong punoan sa buli sa ilang barangay mao ang kapeligro niini sa panahon nga mokusog ang hangin kay dali man kining matumba.
Pipila na ka kinabuhi ang nakalas gumikan kay nadat-ogan sa lawas sa buli nga natumba atol sa kusog nga hangin.
Hinuon nakatabang kanila ang ilang mga supplier nga gikan sa ubang mga kalungsoran sa lalawigan sama sa taga Compostela , Liloan ug uban pa nga mohatud og lanot sa buli.
Gibutyag ni Mangubat nga tag P20 ngadto sa P25 ang ilang baligya sa matag silhig nga lanot sa buli ngadto sa mga suki nilang tindahan dinhi sa Sugbo. (BANAT NEWS)