P200 mil nga alahas gisakiyo kawatan

CEBU, Philippines - Sobra sa P200 mil ang kantidad sa mga alahas ug butang ang nadala sa wala mailhing kawatan niadtong Biyernes sa gabii gikan sa usa ka balay diha sa Canton Ville, barangay San Isidro, dakbayan sa Talisay.

Ang biktima mao si Elizabeth Grace Almadin Alcazar, 26, minyo ug residente sa maong dapit dali kining mi-report sa mga polis kabahin sa insidente.

Nadala sa wala mailhing kawatan kinsa milungkab sa balay ni Alcazar ang mga alahas niini nga nagkantidad tanan og P200 mil ug usa ka Samsung laptop nga nagkantidad og P29 mil.

Sa imbestigasyon nila ni SPO1 Edgar Causon, SPO1 Benjamin Sebellita ug PO1 Evie Espina nga mga alas 6:30 sa buntag niadtong Biyernes si Alcazar milakaw kini ug mga alas 9:50 sa gabii sa mao gihapong adlaw nauli ang biktima.

Si Alcazar nahibulong nga naabli na ang gate sa iyang balay nga sa iyang pagbiya sirado man kini ug ang pultahan sa kusina abli na usab.  Ang mga blade sa jalousy nga bintana nangatangtang na ug ang steel niini nangabawog na pud.

Ug paghiling sa biktima sa iyang mga butang sa sulod nawagtang na ang iyang mga alahas ug ang nahisgutang laptop.

Ang kapolisan nagpahigayon og follow-up nga imbestigasyon sa maong hitabo. (BANAT NEWS)