CEBU, Philippines - Nabuak ang ulo sa usa ka amahan nga nerbyuso human kini moambak sa taytayan sa Tres de Abril barangay Labangon, pasado alas 8:00 sa buntag kagahapon.
Ang biktima nailhan nga si Romulo Rejoy, 46, molupyo sa maong barangay diin giingong adunay sakit nga nervous breakdown.
Sa pakighinabi sa Banat News ni PO1 Reoful Adalim sa Homicide Section, nasayran nga usa ka Katrina ang nakakita sa biktima dihang mikalit kini og ambak sa tulay sa maong lugar.
Gani, nakita pa ni Katrina kun naunsa kini dihang mitugpa na sa sementadong dalan nga maoy naingnan sa hinali niyang kamatayon .
Gihulagway usab ni Adalim nga ang ulo sa biktima maoy nag-una ug tugpa busa nasuta niya nga kini nabuak.
Matud pa kapolisan nga may gihabugon nga 20 ka tiil ang giladmon sa tulay nga maoy hinungdan sa hinanaling kamatayon sa biktima.
Dugang pa ni Adalim nga nasuta nila nga may sakit nga nervous breakdown ang biktima gikan sa igsoon niini nga si Joselito kinsa mitug-an nga niadtong 2008 nagsugod ang sakit sa biktima.
Gibutyag usab niini nga posibling problema pinansyal ang usa sa mga naingnan sa iyang sakit nga misangpot sa iyang paghikog.
Nasayran usab sa kapolisan nga ang biktima adunay upat ka anak nga iyang giatiman samtang tua sa Manila ang iyang asawa.
Gibutyag usab ni Adalim nga walay nakitang foul play ang paghikog sa biktima tungod kay base sa saksi mi-ambak gayud kini ug walay tawo nga mitukmod kaniya aron matagak sa maong tulay. (BANAT NEWS)