Kapin 200 gramos nga shabu gi-flush sa CR

CEBU, Philippines - Gikutaw sa tubig ang 252.80 gramos nga shabu kagahapon sud sa sala ni Judge Macaundas Hadjirasul isip kabahin  sa probisyon sa Republic Act 9165 or Comprehensive Dangerous Acts of 2002 aron dili na kin i-recycle pa sa mga badlungon.

Matud pa ni Hadjirasul nga ang ilang gihimo sa mga ebidensya kay usa ka mandatory procedure ilawom sa balaod kini kun mahuman o maresolba na ang mga kaso nga gikalambigitan sa mga ebidensya.

Usa sa mga kaso nga ang mga ebidensya giapil sa gikutaw sa tubig ug giyabo sa kasilyas mao ang People of the Philippines versus Randy Nuñez. Ang maong kaso nadesisyonan niadto pang Pebrero 3, 2012. Ang kapolisan nakakuha og usa ka heat-sealed transparent plastic nga shabu nga mitimbang og 0.02 gramo.

Gawas sa shabu duna say mga ebidensya nga marijuana nga giapil sa paghipos sa hingpit, kini gikan pa sa 71 ka nadesisyonan nang mga kaso sukad pa niadtong 2010 hangtud sa 2012.

Gisaksihan ang maong kalihokan sa mga representante sa mga sakop sa media; staff ni Judge Hadjirasul; Judge Hadjirasul; PO2 Joseph Bucayan, sa Crime Laboratory; Atty. Gladys May Barriga, sa Public Attorney’s Office; State Prosecutor Mario Ley Gidayawan, sa Department of Justice (DOJ) ug Ma. Jonah Pinanonang, sa Philippine Drug Enforcement Agency (PDEA)-7.

Human sa imbentaryo, ang mga shabu gibutang sa balde nga dunay tubig dayon gibubo sa kasilyas.

Apan matud pa ni Hadjirasul sa usa ka gatos ka kasong ilang nadesisyonan, wala kaabot sa napulo ka porsiyento ang nakombikto, sagad sa hinungdan sa pagka-dismiss sa mga kaso matud niya kini tungod sa wala pagsunod sa mga arresting officers sa procedure nga gipatik sa balaod.

Matud niya importante gyud ang chain of custody sa ebidensya gikan sa pagsakmit  hangtod sa paghatud niini sa laboratory ug ang hustong pagbutang og marka sa makuhang ebidensya diha pa lang sa crime scene usa sa mga angayang buhaton sa mga arresting officers. (BANAT NEWS)