CEBU, Philippines - Usa ka gidudahang video carrera machine operator ang gidakop human gikatahong misuway og suborno sa mga polis aron pabuhian ang iyang upat ka mga sakop ug i-uli lang ang ilang mga makina nga gisakmit sa kapolisan.
Ang maong mga makina nasakmit gikan sa Barangay Sambag Dos niadtong nakalabay’ng adlaw’ng Miyerkules sa mga sakop sa City Intelligence Branch.
Ang giingong misuway og suborno sa mga polis mao si Glenn Lastimoso King,42, taga barangay Vito, sa lungsod sa Minglanilla kinsa giingong mitunol og P6,000 cash sa mga polis atol sa entrapment operation diha sa Fortich St., Barangay Guadalupe sa siyudad sa Sugbo.
SPO2 Jeffrey Diola, usa sa mga CIB operatives miingon nga gisuwayan ni King sa pag-areglo ang maong kaso aron pabuhian sila si Russam Basubas, Jimbo Tapayan, Jimbert Lapuz, ug James Labajo.
Ang upat gikatahong nadakpan sa akto nga namusta ug nagduwa sa mga makina nga gipanag-iya ni King diha sa dalan B. Rodriguez St., sa Barangay Sambag Dos.
“Aregluhon na lang daw namo unya mobayad siya og P6,000 namo,†matud pa ni Diola.
Matud pa ni Diola nga si Tapayan maoy mitawag kang King ug gipahibalo bahin sa pagkadakop kanila.
Sumala pa ni Diola sa panag-abot nila ni King gitunol dayon niini ang kwarta hinungdan nga ilaha kining gidakop, ang operasyon gipangulohan ni Insp. Willian Alicaba. (BANAT NEWS)