Kanhi VM Fortuna competent nga consultant sa Mandaue — Abadia

CEBU, Philippines - Bag-o lang na-renew sa kagamhanan sa dakbayan sa Mandaue ang consultancy ni kanhi Bise Mayor Carlo Fortuna.

Si Fortuna nga kanhi sakop sa oposisyon gikuha sa dakbayan nga consultant on legislative affairs sugod sa Enero sa miaging tuig ug “renewable” kada unom ka bulan.

Matud ni City Administrator James Abadia nga si Fortuna ang labing “competent” sa 28 ka mga consultants sa dakbayan,

“He submit reports required by the contract and even goes beyond the call of duty ”, si Abadia miingon.

Ang matag consultant sa dakbayan magdawatan og P18,000 matag bulan apan kini mausab ug mosaka depende sa ilang performance.

Sa laing bahin, si kanhi kongresista Nerissa Soon-Ruiz miluwat sa iyang katungdanan isip consultant sa dakbayan on public health human siya midagan pagka-kongresista ubos sa One Cebu Party.

Maoy ikasakbang ni Soon-Ruiz si Incumbent 6th District Representative Gabriel Luis Quisumbing nga magpasubli sa iyang katungdanan nga kandidato ubos sa Liberal Party.  Si Ruiz gipilde ni kasamtangan Mayor Jonas Cortes sa miaging local elections sa tuig 2010. Sa miaging tuig gikuha ni Mayor Cortes si Ruiz isip consultant on public health tungod kay usa man siya ka medical doctor.  (BANAT NEWS)