CEBU, Philippines - Patay ang usa ka 23-anyos nga gidudahang pusher atol sa gilusad nga operasyon sa kapulisan nga nagsugod sa usa ka buy-bust operation didto sa Sitio Panas sa barangay Daanlungsod sa lungsod sa Tuburan niadtong Sabado sa alas 10:55 sa buntag.
Ang biktima nga patay diha-diha mao si Jonabele Cantay Malirong alyas Gigi, 21, molupyo sa barangay Cogon sa lungsod sa Tuburan.
Samtang ang nakapusil kaniya atol sa operasyon mao si PO2 Roberto Rondina. Nadakpan usab ang kauban ni Malirong nga si Mario Senining alyas Taay nga nakuhaan og usa ka sachet nga gituohang dunay sulod nga shabu.
Matud ni PO1 Jezrel Perigo sa Tuburan Police Station dihang nahinabi sa Banat News unang nadakpan sa buy-bust operation si Senining diin kini napalitan sa mga operatiba og usa ka paketeng gidudahang shabu.
Sumala pa nga mitug-an si Senining nga ang iyang source sa gidiling drugas mao si Malirong apan paglabay sa pipila ka gutlo gibakwi pag-usab ni Senining ang pamahayag niini.
Apan daling gilusad sa kapolisan ang followup operation ug karon ang target mao na si Malirong apan gikatahong nakabantay kini ug daling migawas sa ilang balay ug midagan hinungdan nga nahitabo ang ginukdanay.
Atol sa ginukdanay gikatahong mibunot og paltik nga .38 kalibreng rebolber si Malirong ug gipusil si PO1 Narvin Abueva apan nikagar ang armas niini, dihang mousab na pud unta kini og kablit sa gatilyo giunhan na kini og pusil ni PO2 Rondina nga nagposte na sa pikas nga bahin ug naigo sa tuong bahin sa ulo si Malirong.
Gisuwayan pa unta og tabang ang biktima ug gidala sa ambulansiya paingon sa tambalanan sa dakbayan sa Sugbo apan pag-abot sa barangay Logo namatay kini hinungdan nga gibalik nalang sa agi.
Gipaabot nga ipaubos usab sa imbestigasyon si PO2 Rondina kabahin sa maong panghitabo. (/EIM)(BANAT NEWS)