CEBU, Philippines - Kusganong gipasidan-an sa Land Transportation Franchising and Regulatory Board-7 ang mga pasahero nga dili manakay og mga kolorum buses tungod kay dili kini mga insured ug kung dunay mahitabong aksidente sila ra unya maoy magmahay.
"Risgo kaayo mosakay og kolorum nga mga buses kay simbako og naay disgrasya ang mga pasahero walay madawat nga benepisyo sa insurance,†matud pa ni LTFRB-7 regional director Ahmed Cuizon.
Ang pahimangno gihimo ni Cuizon atol sa paghatag kagahapon sa insurance claims sa biyuda sa usa sa mga pasaherong nakalas sa aksidente sa Uling, sa siyudad sa Naga sa nakalabay nga semana.
Si Jocelyn Costanilla, asawa sa namatay nga si Melvin Costanilla nga kauban sa dose ka tawo nakalas midawat sa P35,000 nga pasiunang hinabang pinansyal gikan sa Passenger Accident Management Insurance (PAMI).
Ang PAMI maoy usa sa duha ka accredited insurance companies sa LTFRB nga nag-operate sukad pa sa tuig 1999.
Si PAMI-Cebu manager Judy Durano miingon nga sa dose nga nakalas si Costanilla pa maoy una nilang nahatagan nga benepisyaryo, duna pay dugang P40,000 nga ihatag kaniya kun makompleto na ang tanang gipangayong rekisitos.
Matud pa ni Durano sunod nga hatagan mao ang mga benepisyaryo sa uban pang mga nakalas.
"We are prompt in payment basta malihok lang gyud dayon ang mga requirements like police report," matud pang Durano.
Ang insurance policy sa PAMI nag-ingon nga makadawat og P75,000 ang mga kabanay sa matag pasaherong makalas sa aksidente ug P15,000 kada usa sa mga angol.
"Sa wala pa nisakay sa bus akong bana, nagbinuang daw na sa iyang kumpare nga nagluto og balanghoy. Iyang giingnan iyang kumpare, nga mas maayo pa mosakay og sakyanan nga wala’y brake kay og madisgrasya, naa pay madawat. Pero og mokaon ka og balanghoy unya mahilo ka, wa gyud kay madawat. Nababaan gyud sa akong bana ang mahitabo niya," matud pang Costanilla, ang ginang adunay unom ka mga anak ug wala siya’y trabaho.
Matud pa niya ang nadawat niyang salapi sa insurance iyang ibayad sa pagpalubong sa iyang bana ug ang mahibilin ipadaplin niya alang sa pagpatungha sa mga anak ug magtukod og gamay nga negosyo.
Matud pa ni Cuizon dunay 1,600 ka mga bus ug mini-bus nga nagbiyahe sa Cebu apan 80 porsiyento ra niini ang insured.
Sumala pa ni Cuizon sagad niining mga kolurom nga bus mao kadtong wala makapasar sa road worthiness test apan pabiyahion gihapon sa mga operators.
"Dili na ni sila magpa test, kay they knew di sila makapasar. Mao nang mag colorum na lang. So dapat ang mga pasahero, adto gyud manakay sa terminal and see to it they are riding sa mga well-known na nga mga buses kay kana sila tested na na sila," matud pang Cuizon.
Nasayran nga sagad niining mga kolurom nga bus mobiyahe lang panahon sa kaadlawon tungod kay menus ra kaayo ang pagpanakop. (BANAT NEWS)