CEBU, Philippines - Ang Metropolitan Cebu Water District (MCWD) nagtuon pa sa hangyo sa presidente sa Association of Barangay Council (ABC) sa dakbayan sa Talisay nga himoan og kahon o sakuban nga puthaw ang mga kuwentador sa tubig sa maong lugar aron dili kawaton.
Ang maong hangyo ni ABC President Charles Basillote mitumaw tungod sa pagkuyanap sa kinawatay sa mga kuwentador sa tubig sa maong siyudad.
Kagahapon atol sa regular nga sesyon sa konseho sa maong dakbayan giaprobahan ang maong resolusyon ni Basillote.
Apan sa press statement sa MCWD nga gipadangat sa The Freeman (igsuon publication sa Banat News) nagkanayon nga adunay mga butang nga angayang hunahunaon nga mao ang aspetong social ug financial sa pagpataud ning maong mga sakuban sa mga kuwentador.
Kini tungod kay kinahanglang gamitan kini og mga materyales sama sa kabilya ug welding machine.
Gipasabot sa MCWD nga may espesyal silang kahimanan alang niini nga gitawag og meter cuffs nga barato ang gasto ug dali usab nga ikataud itandi sa mga sakuban nga puthaw.
Hinuon ang mga kadagkoan sa MCWD gitakdang magtigom karong adlawa aron tukion ang gihangyo ni Basillote.
Base sa talaan sa kapolisan , mikabat na sa 15 ka kuwentador sa tubig ang nawagtang kay gikiriw sa wala hiilhing kawatan sulod ning buwana sa nagkadaiyang dapit sa Talisay.
Sa barangay Bulacao may pito ka mga metro sa tubig ang gikawat sulod lang sa usa ka adlaw. Ang MCWD nabalaka sa dakong kalagmitan nga tungod sa kalisud sa kahimtang sa mga kawatan may kalagmitan nga ilakip usab sa pagkawat niini ang mga putos unya sa mga kuwentador.
Sa laing bahin, ang MCWD mohatag og ganting salapi sa mga tawong makahatag og impormasyon o makatabang og dakop sa mga kawatan og kuwentador sa tubig , ingon man niadtong mopalit niini (BANAT NEWS)