CEBU, Philippines - Gipaila sa usa ka opisyal sa pabrika sa barko ang kahanas ug kabatid sa mga mamumuo nga Filipino sa pagpanday og barko.
Matud pa ni Joey Turano, general manager sa Austal Philippines Shipyard Operation nga nagbase sa barangay Arpili, lungsod sa Balamban nga nakadayeg siya sa abilidad sa mga welder nga Filipino nga maoy nagpanday sa mga barko nga ikapadagan sa tibuok kalibotan kun world-class nga klase sa mga sakyanan sa kadagatan gumikan sa kaayo og agi niini.
Matud niya nga ang mga trabahante nga Filipino dili bintahaan bisan sa mga trabahante nga gikan sa ubang kanasuran.
Ang Austal Global Defence Prime Contractor maoy tiggama sa mga barko de gira sa US Navy.
Ang ilang gitawag nga US Navy patrol boat, US Navy Destroyer ug tanang sakyanan sa kadagatan sa US Navy, gipanday sa nahisgutang kompaniya nga nagbase didto sa Australia ug uban pang nasud sa kalibotan.
Ang Austal Philippines nga gibuksan sa miaging semana maoy labing bag-ong sangang pabrika sa maong kompaniya nga ania sa Pilipinas.
Busa gitawag ang Austal og kompaniya nga tiggama sa mga desinyo, paggama og plataporma ug pagmentinar sa mga barko de gira sa US.
Sa pagkakaron may 250 kini ka mga Filipinong trabahante kauban sa 50 ka mga Australyanong kawani sukad kini magsugod sa iyang kalihokan sulod sa West Cebu Industrial Park sa Arpili, Balamban 10 na ka buwan ang nakalabay.
Sumala pa ni Turano nga sulod sa maong gidugayon nilang operasyon sa Balamban sa Sugbo, nakagama na sila og pipila ka barko nga matawag nga world-class pinaagi sa mga trabahante nga Filipino uban sa mga Australyanong panday sa barko.
“The impressive skills and experience of the people in Cebu is central to that potential,†kini matud pa ni Turano.
Maoy hinungdan nga nakahukom sila sa pagtukod og sanga sa ilang kompaniya dinhi sa Pilipinas human nila masayri nga ngilngig og abilidad ang mga Filipino, dugang pa niya. (Liezl Mabini Frasno-correspondent/WC) (BANAT NEWS)