CEBU, Philippines - Gisikop ug gipriso sa kapolisan sa dakbayan sa Mandaue ang usa ka suspetsadong manlulugos human mosumbong ang 13 anyos nga nagsabak niyang biktima ngadto sa kapolisan.
Giila sa kapolisan ang suspetsado nga si Michael Palintos, hingkod nga silingan sa biktima sa sitio Mohon II, barangay Banilad, dakbayan sa Mandaue.
Si Charita Miñoza, hingkod, ug inahan sa biktima maoy misumbong sa kapolisan human niya imbistigaha ang iyang anak bahin sa makapatahap nga pagburot sa tiyan niini.
Matud ni Miñoza nga gikomprontasi niya ang iyang anak niadtong Lunes ug mitug-an kini nga kaniadto pang Oktubre 18, 2012 siya lugosa sa suspetsado apan tungod sa kahadlok niini wala kini mobutyag sa iyang inahan. Giandam na sa kapolisan ang kasong pagpanglugos batok sa suspetsado kinsa gitanggong karon sa prisohan.