CEBU, Philippines - Napulo na ang tanang patay ug siyam pa lang ka biktima ang nailhan wa pay labot sa laing 39 ka mga pasahero nga na-angol sa nahitabong binanggaay tali sa prime mover nga nagkarga og bulldozer kontra sa bus pasaheroan nga JS Calvo Bus diha sa national highway sa Sitio Gaway-gaway sa barangay Uling sa siyudad sa Naga niadtong Miyerkules sa alas 4:45 sa hapon.
Ang mga namatay mao ang drayber sa prime mover nga si Antonieto Omagay,40, taga dalan F. Llamas sa barangay Punta Prinsesa sa siyudad sa Sugbo mga pasahero sa bus nga sila si Lyle Carmita, 15; Emmauel Gaudicci; Cayetana Fernandez, 63; Melvin Costanila;Lili Taitang, 51; Junie Pahamutan; ig-agaw nga si Jollie Pahamutan; Almera Pamandaman, 36; ug ang gibanabanang 20-anyos nga lalaki nga wala pa mailhi.
Samtang laing 39 ang mga naangol nga nalandig sa tambalanan ug laing 23 ka mga biktima ang gidala sa Carmen Copper ug laing 26 ka mga biktima nalandig sa Toledo City District Hospital apil ang drayber sa BT Calvo Transit nga si Jimmy Limoran.
Matud ni PO2 Donisio Traumata sa Naga City Police dihang nahinabi sa Banat News kagahapong adlawa gi-claim na sa mga kabanay ang ubang mga namatay.
Ang trak nga gipanag-iya sa WT Construction nagkarga og bulldozer ug nagdulhog sa maong dapit dihang gikatahong nawad-an kini og brakes ug nasampak sa gikasugat nga bus.
Nasuta sa kadagkuan sa Land Transportation Office nga adunay kakulang sa traffic signs sa maong lugar ug adunay sayop sa drayber sa prime mover.
Ang regional director sa LTO nga si Raul Aguilos, mipadayag sa Banat News pinaagi sa text message nga kulang kaayo ang maintenance sa prime mover nga miresulta sa pagkawala sa brakes niini.
Matud pa ni Aguilos nga kuwang usab ang mga warning signs sa downhill nga parti sa maong dalan nga aron unta magpasidaan sa mga drayber nga moagi.
“Driver sa prime mover at fault, siya man ang nigawas sa iyang line ug nibangga sa Calvo Bus. Kulang mga warning signs sa downhill approach. Lack of or poor maintenance sa sakyanan,†matud pa ni Aguilos sa iyang text.
Midugang si Aguilos nga kinahanglan gyud unta sa mga pribadong mga kompanya nga nag-operate og mga dagkong truck nga batasanon ang safety maintenance sa ilang mga sakyanan.
“We encourage private corporations to practice a culture of safety and security on their respective workplaces apil na ang pag-conduct og trainings and seminars about road safety,†dugang pa ni Aguilos.
Samtang ang EVP Insurance Agency nga maoy naghupot sa insurance sa WT Construction mideposito na og P100,000 sa South General Hospital alang sa panginahanglan sa mga nangaangol.
Matud ni Boy Padilla, maoy nagproseso sa insurance, nga aduna silay problema sa financial assistance adtong anaa ma-admit sa Vicente Sotto Memorial Medical Center lakip na ang mga namatay kay P100,000 lang ang coverage sa insurance.
“Ang problema naa sa funeral homes ug sa VSMMC pero WT is willing nga makig-estorya sa Calvo (owner of the BT bus) to make an arrangement for the victims,†sigon ni Padilla.
Si Padilla midugang nga adunay mga provisions ang pagkuha sa insurance ug kini maoy ilang sabutan sa Calvo ug WT Constructions. Lakip sa hisgutan kung unsaon nila sa pagtabang ang ubang naangol.
“I-determine pa man pud kung kinsa gyud ang fault pero di lang una ta mosulti pending investigation sa police,†matud niya. (BANAT NEWS)