CEBU, Philippines - Patay ang usa ka 4-anyos nga batang lalaki ug naangol ang mga igsuon ug ginikanan niini human ang traysikad nga ilang gisakyanan ang gi-hit and run sa usa ka kolor itom nga sakyanan niadtong Lunes sa gabii diha sa N. Bacalso Avenue, barangay Bulacao, dakbayan sa Talisay.
Wala na makaabot nga buhi ngadto sa Vicente Sotto Memorial Medical Center ang 4-anyos nga si Niño Gondino.
Samtang ang iyang amahan nga si Ronnie Gondino, 44, inahan nga si Elvira, ug mga igsuon nga sila si Erica Mae, 7-anyos, ug usa pa ka tuig nga si Faith ang nangaangol.
Ang mga biktima mga residente diha sa Upper Inayawan, dakbayan sa Sugbo.
Si PO1 Rosauro Pasumala sa Talisay City Traffic Division mibutyag nga base sa imbestigasyon ni SPO2 Elmer Saladas ang pamilyang Gondino sakay sa ilang traysikad nga gimaneho sa amahang Gondino gikan sa Tabunok paingon unta sa dakbayan sa Sugbo.
Apan pag-abot diha sa nahitaboan usa ka itom nga awto padulong sa siyudad sa Sugbo ang kalit nga mibangga kanila hinungdan sa pagkalimbuwad nila.
Si Niño nalabay og pipila ka metros ug nakaangkon og grabeng kadaot sa lawas nga hinungdan sa iyang kamatayon.
Ang wala’y konsensya nga drayber sa itom nga awto wala mohunong bisan tabangon lang ang mga biktima. Matud ni Pasumala nga ang drayber sa ambulansiya sa lungsod sa San Fernando nga nakaagi sa lugar mao nay mihunong ug mihatud sa mga biktima ngadto sa tambalanan, apan namatay si Niño.
Ang kapolisan sa traffic division nagpahigayon og follow-up nga imbestigasyon sa maong hitabo. (EIM)(BANAT NEWS)