Nadakpan RA gyud si ‘Torney

CEBU, Philippines - Nasikop na gyud sa katapusan sa mga operatiba sa Investigative and Detective Management Bureau (IDMB) sa dakbayan sa Mandaue ang usa ka gipasanginlang banggiitang mangingilad nga mogamit og mga alyas.

Ang suspek nga magpaila kanunay nga usa ka abogado ug usahay pari, o ba kaha usa ka doktor nadakpan ra gyud sa kapolisan atol sa ginukdanay sa sakyanan diha sa barangay Banilad ning dakbayan sa Sugbo.

Giila sa kapolisan ang suspek mao si Joseph Llanes Cua, 25,  nga taga Davao kinsa tulo na ka bulang nagpuyo sa Waterfront Hotel and Casino sa barangay Lahug ning dakbayan.

Ang suspek gikatahong nangabang pa og iyang service nga usa ka Toyota Innova nga iyang gigamit sa paglaroy-laroy dinhi sa Metro Cebu.

Si Cua maoy gitumbok nga “Atty. Cortes” nga misakiyo sa P122,000 sa VHEZ Money Changer sa dakbayan sa Mandaue niadtong adlaw’ng Huwebes.

Giilad niya ang teller nga si Anthony Lauron kay kini nagpaka-aron ingnong magpa-ilis og 3,000 dolyares. Apan dihang gidala na ni Lauron ang kwarta gikan sa ilang opisina gisugat kini sa suspek diha sa may pultahan ug gi-maniobra og estorya hangtud nga nadala si Lauron sa pasalig nga balikon kay kuhaon ra niini ang dolyares ngadto sa iyang mama nga usa ka doktor nga nagsimba pa sa sulod sa National Shrine of St. Joseph Parish dili layo sa maong money changer.

Si Cua nadakpan human usa ka impormante ni Chief Insp. Michael Bastes sa IDMB ang mitawag sa naulahi kabahin sa presensya ni Cua diha sa gipuy-ang dakong hotel diha sa Lahug.

Aron dili maalarma ang mga guest sa hotel gipaabot nila ni Bastes nga mogawas si Cua sa maong hotel, tuod man migawas kini luwan sa gi-abangang Toyota Innova padulong sa Cempark sa Barangay Banilad.

Samtang gisundan kini sa kapolisan, nakabantay si Cua maong miliko-liko kini og agianan apan naabtan gihapon kini ug gidakop.

Wala mahibalo si Cua nga nakuhaan siya og litrato sa usa sa mga una niyang gibiktima diha sa Basilica Minore del Sto.Niño nga mga Korean tourist. Niadtong tungora nagpaila si Cua nga siya si Fr. Glenn.

Sumala pa nga mi-boluntaryo si Cua sa mga Koreano nga siya na lay mokuha sa pictures sa mga Koreano kay bawal ang pagkuha og pictures sa maong simbahan.

Apan wala makabantay ang suspek nga samtang iyang gikuhaan og litrato ang mga Koreano gikuhaan usab diay siya og pictures sa mga turistang iyang giilad.

Human makuha ang litrato sa mga Koreano miikyas si Cua maong midangop na lang sa kapolisan ang mga Koreano ug gikopya ang litrato niya diha sa camera sa       turista.

Matud ni Bastes, tulo ka buwan na gikan niabot ang suspek dinhi ug gani base sa billing niini sa maong hotel mi-abot na kini hapit og P100,000.00, butang nga gihimakak sa suspek kay nabayran na niya kini.

Walay nabawi nga kwarta ang kapolisan gikan sa suspek ug ilang nasayran nga gi-gastos na niya kini ug gipamalit og mga mahalong butang.

Gawas kang Lauron nga positibong miila kang Cua nga maoy nangilad kaniya, duna pay laing pito ka biktima ang mitumbok gihapon kang Cua nga maoy nangilad kanila.

Naglakip niini ang duha ka money changers, ang Allure Hotel ug ang Junrex          Cellshop.

Sumala pa ni Bastes nga modus operandi sa suspek ang mopaila sa iyang kaugalingon nga tawong adunay katungdanan sa katilingban ug sakop sa impluwensyal nga pamilya.

Gawas sa kasong mga pagpangilad o kawat gikasohan usab siya og paghupot og ginadiling drugas human makuhai og usa ka paketeng shabu.  (BANAT NEWS)