ISABEL, LEYTE, Philippines – Usa ka tawo ang patay samtang tulo ang angol sa nahitabong pinusilay sulod sa peryahan sa lungsod sa Isabel, Leyte niadtong Sabado sa gabii.
Nagduda ang kapolisan nga personal nga kasungian ang motibo sa pinusilay apan wala pa matino kung giunsa kini pagsugod.
Ang nakalas mao si Romulo Caminero y Tampos, nga giingong usa ka kanhi Overseas Filipino Worker kinsa igo rang miuli sa ilang lungsod tungod sa pista karong adlawa Enero 15.
Napagan sa crossfire ug nangaigo og tagsa ka bala sila si Ricky Almoroto, 22; Evelyn Maraviles, 24, ug Joey Pabirara, 27, ug gidala sa tambalanan sa Ormoc City.
Dunay mga testigos ang matud pa mitug-an kang police investigator PO3 Joel Soqueña nga si Caminero maoy usa sa mga nagsugod sa pinusilay.
Matud pa nga misulod si Caminero sa peryahan nga nagdala og caliber .45 pistol ug nangita kang Eliseo Araño. Pagkakita ni Araño kang Caminero nga dunay armas dali kining mipasalipod sa mga tawo apan nakit-an kini ni Caminero ug diha-diha gipaulanan kini og bala.
Si Araño matud pa armado usab og kalibre .45 pistola ug mibawos og pusil kang Caminero ug naigo kini sa batiis, apan nabugtoan kini sa kinabuhi tungod sa kadaghan sa dugo nga mi-awas kaniya human maigo ang dakong ugat niini sumala pa sa imbestigador.
Gidudahan ni Caminero si Araño nga maoy mipusil kaniya pipila ka adlaw na ang nakalabay apan wala maka-igo. Si Araño mitahan human sa hitabo. They are now preparing to file complaints of murder, illegal discharge of firearm and serious physical injury against him. (/EIM)