Gitigbas bukobuko naukab

CEBU, Philippines - Naukab ang bukobuko sa usa ka mag-uuma human kini tigbasa  sa iyang  silingan  atol  sa  pagduwa nila og  volleyball didto sa barangay Cansaloay, lungsod sa Oslob niadtong Sabado sa alas 8:00 sa gabii.

Ang biktima mao si Jaime Robin Licayan, 40, minyo, usa ka mag-uuma nga nagpuyo sa maong lugar, samtang ang suspek iya ra usab nga silingan nga si Joseph Jumalon, hingkod, ulitawo,  nga  iyang  silingan.

Si SPO1 Job Sarveda sa Oslob Police Station mibutyag sa Banat  News  nga ang biktima ug ang suspek uban ang ilang mga higala  nag-inom  samtang nagtan-aw sa duwa   nga volleyball sa maong lugar.

Apan matud pa ang biktima ug ang manghud niini nga si Jessie Licayan  nagkalalis niadtong  tungora.

Wala makabantay ang biktima nga ang suspek nga suod nga higala sa iyang manghud mipauli ug sa pagbalik niini  nagbitbit na og sundang dayon  gihabas  ang  iyang  likud.

Wala  na  kausbi  og  tigbas  ang  biktima  kay nasanta  sa ilang  kauban  ang suspek kinsa  milayas  usab  dayon  dihang  nakita  nga  nababha  ang  buko-buko  sa biktima.  

Ang biktima gihatud dayon  ngadto sa Oslob District Hospital apan gi-transfer usab dayon ngadto  sa tambalanan  sa dakbayan  sa Sugbo.

Sa pakisusi sa kapolisan nasayran nga milaban lang  ang suspek sa manghud sa biktima nga  gikalalis niini. (/WC)  (BANAT NEWS)