Motor vs. de karga 1 patay

CEBU, Philippines - Namatay ang usa ka tawo human dasmagi  sa trak de karga   ang  motorsiklong  gisakyan  niini   sa dalan Hernan Cortes, barangay Subangdaku, dakbayan  sa Mandaue ala 1:00 pasado ang takna sa hapon kagahapon.

Si PO1 Nelson Sadili, imbestigador sa traffic division sa Mandaue City Police Office (MCP0) miila sa namatay nga  si John Nino Ponce Co, 31, nga nagpuyo sa barangay Alang-Alang, samtang   ang drayber  sa Fuso Canter  nga  midasmag   sa sakyanan  sa biktima  mao  si Reynaldo Danuso, 43, minyo, nga  taga barangay Tingob sa maong  dakbayan. Sa imbistigasyon nga  gihimo  nila  ni PO1 Sadili  nasuta nga nagsubay  sa    maong dalan ang  biktima  paingon sa barangay Banilad sa maong dakbayan  samtang  ang dump truck  gikan  usab  sa kaatbang  nga       direksyon.

Matud pa ni PO1 Sadili   pulos  kusog nga nagdagan ang duha ka sakyanan ug maoy iyang pagtuo nga nadagit   sa dump truck ang motorsiklo nga giluwanan sa biktima hinungdan  nga  kalit  kining  misaliring  ug nalagpot  ang  biktima  ug  sa pagtugpa  niini sa  karsada  nalatayan  sa  ligid sa Fuso Canter nga maoy  nakaingon  sa  iyang  kamatayon.

Ang  drayber  sa sakyanang  nakadasmag  anaa  na  sa kustodiya  sa kapolisan  nagpaabot  sa kiha  nga  isang-at  batok  kaniya  sa tagtungod  sa biktima.( /WC) (BANAT NEWS)