Nagmotor nga way helmet namatay

CEBU, Philippines - Namatay  ang drayber  sa habal-habal  human  mapantok  ang  ulo  niini nga walay  helmet sa sementadong  karsada pagkalamba sa  iyang  sakyanan   didto sa highway  sa barangay Liboron, dakbayan  sa  Carcar sa miaging  Biyernes  sa gabii.

Ang biktima  nailhan  nga  si Joey Bacatan, 32, minyo, nga nagpuyo sa maong lugar ug drayber sa habal- habal .

Samtang ang iyang pasahero nga  usa ka  kawani sa Cebu Electric Cooperative (CEBECCO) Dumanjug branch  nga  si Mario Lazarte, 42, minyo,  nasalbar  gikan sa kamatayon.

Si PO2 Abelardo Beton sa Carcar City Police Station  mibutyag sa  Banat News  nga  nagpaingon  sa barangay  Can-asujan ang  biktima  kay naghatud sa   iyang  pasahero.

Apan  matud pa ni Lazarte  dihang  gisukit-sukit  sa kapolisan  nga sa pag-abot  nila sa Liboron kalit  lang   mipaka  ang  buto  sa armas  de fuego.

Dayon  nakamatikod  siya  nga  mi-zigzag  ang dagan  sa motor hangtud  nga  nalamba  kini  pag-abot  sa unahan.  

Miingon  si  Lazarte  nga tungod  kay nakabantay  siya  nga  lain  na ang  dagan  sa motorsiklo nangandam  siya busa nakaambak  dayon  siya  ug  wala  siya  maunsa.

Samtang ang biktima kinsa  walay helmet wala  na makabangon  human  mapantok   ang  ulo  niini  sa sementadong  karsada   ug  dihadiha  nakuyapan.

Ang  miresponding  kapolisan   maoy  mihatud  niini  ngadto  sa  Carcar District Hospital diin  kini ideklarar sa mga doctor   nga  patay  na.

Hinuon giklaro sa mga doktor nga walay  samad pinusilan ang biktima ug ang  namatyan  niini  mao  ang  pagkapantok sa iyang  ulo sa karsada.

Gipa-autopsy pa sa  mga ginikananan ang  patay’ng lawas niini pagtino sa tinuoray’ng hinungdan  sa  iyang  kamatayon. (WC) (BANAT NEWS)