CEBU, Philippines - Duha ka mga lalaking nagtaptap sa ilang mga nawong nga nagsakay og motorsiklo ang mitulis sa usa ka negosyanteng babaye sa dalan S. Duterte sa barangay Poblacion sa dakbayan sa Danao ug mipusil pa sa mirespondeng polis sa dayon nila og ikyas.
Si PO1 Faron Avila kinsa off duty ug naatol nga naglakaw sa maong lugar nakabantay sa komosyon ug daling miresponde apan gi-unhan kini pagpusil sa mga tulisan nga padulong na og ikyas. Dali nga nakapasalipod si Avila sa multicab nga gimaneho ni Joebert Olivar nga nahiagi sa maong dapit ug didto napunta ang bala sa sakyanan.
Si PO3 Ronaldo Perez sa kapolisan sa maong dakbayan miingon nga ang biktima nga si Amelita Nasugban, 42, taga North Poblacion sa barangay San Francisco , Camotes kuyog sa iyang anak nga si Arvin gikan pa sa pier area nga nagsakay og traysikad nga gimaneho ni Ray Talingting.
Padulong unta mangompra sa merkado ang duha dihang kalit nga gibabagan sa motorsiklo sa mga tulisan ug mideklarar og tulis dayong kuha sa iyang shoulder bag nga dunay P17,000, ariyos nga bulawan, duha ka kwentas nga bulawan, duha ka mahalon nga cellphone nga nagkantidad og P100,000 ang tanan. (EIM) (BANAT NEWS)