CEBU, Philippines - Kanhi drayber ni Konsehal Augustus Pe Jr. mipasangil nga gihulga kini sa maong konsehal apan ang konsehal nagdudang posibleng gigamit lang ang iyang kanhi drayber aron dauton ang iyang kandidatora sa 2013 elections.
Usa ka Roldan C. Surela, 32, nga nagpuyo sa Barangay Mabini sa dakbayan sa Sugbo, mi-report sa giingong pag-panghulga kaniya ngadto sa kapolisan ug mipa-blotter niini sa Cebu City Police, City Intelligence Branch.
Nahibaw-an nga dugay nang nahimong drayber ni Pe si Surela apan wala na gi-renew pa ang iyang kontrata. May mga report nga si Surela nanabi sa giingong “negosyo†ni Pe sa Cebu City Jail.
Gisaysay ni Surela sa kapolisan nga niadtong gabii sa Enero 2, nagsultihanay sila si Mabini Barangay Captain Rey Oybenes ug Dennis Caminade didto sa Barangay Talamban dihang miabot ang sakyanan sa konsehal.
Si Surela miingon nga midali siya pagpasalipod aron dili makita sa konsehal kay nasayod siya nga nasuko kini kaniya.
Samtang nagsultihanay si Pe uban nila ni Oybenes ug Caminade, matud ni Surela nga nadungog niyang mihulga ang konsehal nga siya “tumbahon†tungod sa gipanabi niini.
Si Konsehal Pe nga gikontak sa Banat News miingon nga huwaton usa niya nga mohimo og pormal nga reklamo si Surela usa siya mohatag sa iyang tubag.
Gihulagway ni Pe nga “hearsay†ang maong reklamo kun dili siya mopasaka og kaso. Nagduda si Pe nga si Surela gigamit lang sa iyang mga kontra sa politika.
Si Pe kansang termino pagka-konsehal sa north district mapupos na karong Hunyo 30, atua na usab magpapili pagka-konsehal sa south district. (BANAT NEWS)