Joavan mipapriso sa iyang trabahanti

CEBU, Philippines - Nagtingkagol sa karsel ang kanhi trabahanti ni Joavan Fernandez  ang  sinagop nga  anak sa mayor sa dakbayan sa Talisay human kini nasakpang naghupot og ginadiling drugas ug giingong nangunay sa pagpangawat sa iyang  amo.

Ang nasikop mao si Mcnewell Sabejon, 29,  nga taga San Isidro,  Talisay   nga  usa  ka  kanhi trabahanti ni Joavan.

Sa pakighinabi sa Banat News ni PO2 Roy Lofranco sa Talisay   City  Police  Station  misaysay  nga kagahapon  sa  kaadlawon giingong nagmaneho si Joavan sa iyang sakyanan sa diha nga gipara kini ni Sabejon sa pagtuo nga   si  Mayor Socrates  Fernandez  sa dakbayan ang nagmaneho niini.

Apan  dihang   mihunong na ang sakyanan, wala damha ni Sabejon nga si Joavan diay ang sakay niini  busa  mikaratil   siya  og  dagan   sa kahadlok  kay   nagsul-ob  diay  kini  sa  relo  de pulso  ni  Joavan  nga Rolex  nga nagkantidad  og P10 mil.

Tungod niini, daling gigukod ni Joavan si Sabejon ug naabtan gayud  kini  sa dapit  diin  nanagtapok  ang   mga barangay tanod sa barangay Bulacao. Dihang nasikop  ni Joavan si Sabejon girikisa usab kini sa usa sa mga tanod ug didto nahinulan  niini sulod sa  bulsa   ang  upat ka gagmay’ng paketi sa gituohang shabu.

Matud pa ni Lofranco nga base sa gibutyag ni Joavan kanila, dili lang kay ang relo ang gikawat ni Sabejon kun dili lakip na ang pipila ka kabtangan sa iyang amahang mayor.

Ang  suspetsado  nagkagulkol    karon  sa prisohan samtang  gipaabot  ang  kaso  nga  isang-at  batok  kaniya. (Lesley Caminade-Vestil/WC) (BANAT NEWS)