Engineer nailad sa budol gang

CEBU, Philippines - Nagpanlingo  sa kalagot  ug kapungot ang  usa ka site engineer nga nabiktima sa budol-budol gang sa Brgy. San Roque, siyudad sa Sugbo kagahapon sa alas 12:00  sa udto.

Ang biktima mao si Sherly Pocot, 25, nga taga Gorordo Avenue, Brgy. Lahug ning dakbayan.

Matud sa biktima nga nag-atang siya og jeep niadtong higayona sa dihang adunay usa ka babaye ang kalit miduol kaniya ug nangayo og tabang gumikan kay matud pa na-problema  kini  sa  iyang awto nga gi-parking sa sulod  sa Cathedral.

Dugang pa ni Pocot nga nangutana ang suspek kun asa  siya  mangabang  og rent-a-car,  ug dayon gihuwaman niini ang iyang cell phone kay may textan  kuno  siya.

Unya pipila ka minuto ang milabay, miduol ang usa ka mahuyang  ug miingon nga aduna siyay nahibaw-an nga rent-a-car. Nakig-estorya matud pa ang mga   mangingilad kang  Pocot   ug  pagkataud-taod, gipagunitan sa mahuyang ang iyang bag   kang Pocot samtang padayon  kini nga nakig-estorya   sa  babaye  nga  iyang  kauban.

Tungod kay naglisud ang biktima sa pagbitbit sa bag sa mahuyang, gibutang   niya   ang iyang kaugalingong bag samtang gilingaw-lingaw sa  mga estorya  sa mahuyang  ug  sa babaye.

Apan  nakurat  na lang  si Pocot  kay  sa tanto  nilang  estoryahay  maoy nadiskobrehan  niya nga  nahanaw  na  ang iyang  bag nga  gisudlan  sa iyang  laptop nga nagkantidad og  P40 mil, bracelet nga nagkantidad og P1,000 ug P20 mil nga cash.

Samtang nangita  siya  sa iyang  bag, nahanaw  lang  usab  dayon  ang  mahuyang  sa iyang  atubangan. Si  Pocot  walay  laing  nahimo  gawas  sa pagtaho  niini  ngadto  sa kapolisan  sa  Station 3 sa  Cebu City Police Office.

Matud  pa  sa kapolisan  nga  budol-budol  gang  ang  mibiktima  kang  Pocot  ug  milihok  na  sila  sa pagpangita sa grupo.(Gianelli Ann Cañete USJR Intern/WC)  (BANAT NEWS)