Tulisan nga napatay sa iyang biktimahon, nanulis pud diay niana gihapong adlawa

CEBU, Philippines - Usa ka biktima sa pagpanulis ang mitumbok sa napatay nga tulisan nga mao ang mitulis kaniya nianang Huwebes sa kaadlawon sa samang adlaw nga napatay sa usa ka tindero og burger ang suspek diha sa dakbayan sa Talisay.

Ang napatay nga tulisan mao si Junry Escare  kinsa nadunggaban sa tinderong si Ambrosio Candole Jr. kansang gibantayang burger joint gitulis sa suspek ug gisuwayan pagpusil hinungdan nga kini gisuklan ug nadunggaban.

Ang kapolisan sa Talisay padayon pang nangita sa kauban ni Escare nga maoy midala sa samarong si Escare ug mibilin sa patay’ng lawas niini diha sa barangay Dumlog.

Si SPO4 Daniel Tarucan, imbestigador sa Talisay City Police Station sa pakighinabi niini sa Banat News kagahapon mibutyag nga duna silay nakuhang mga hulagway gikan sa cellphone ni Escare sa duha ka revolver diin ang usa niini maoy gigamit sa pagpanulis sa suspetsado nga nailog ni Candole.

Gawas sa mga revolver dunay mga hulagway usab sa duha ka mga bonnet nga diha sa cellphone sa suspetsado.

Ang kapolisan naka-recover og duha ka bonnet nga sama sa hulagway nga naa sa cellphone ni Escare gikan sa posisyon sa patay’ng lawas niini.

Matud usab ni Tarucan nga mopasaka sila og kasong robbery with homicide batok sa usa ka suspetsadong tulisan.

Si Tarucan midugang nga kung ang mga paryente ni Escare mopasaka og kaso batok kang Candole ilaha kining dawaton kung dunay ma-presentar nga lig-on nga ebidensiya ug basehanan sa pagpasaka nila og kaso batok sa tindero. Kagahapon sa buntag usa ka Chylle Remonde, 20, taga barangay Tabunok ang mianha sa TCPS ug mi-claim sa tulo ka cellphone ug tulo ka pitaka nga giingong na-recover gikan ni Escare.

Si Escare gitumbok nga maoy mitulis ni Remonde ug Paul Caballero, 20-anyos.

Pasado alas 3:00 sa kadlawon niadtong Huwebes matud ni Remonde nga siya ug si Caballero gikan nga nag-inom sa may Cebu South Coastal Road habig sa sitio Uldog, barangay Poblacion, Talisay.

Niadtong higayona naglakaw na sila paingon sa Tabunok dihang dunay duha ka mga motorsiklo nga misugat kanila ug ang usa ka lalaki nga angkas sa usa ka motorsiklo mibalhin ngadto sa laing motorsiklo. Matud ni Caballero nga diha sa unahan giatangan sila sa maong mga lalaking nag-motorsiklo ug usa niini ang miti-on kanila og pusil ug gipangayo ang ilang mga cellphone.

Gibutyag ni Caballero nga mosuway unta og sukol si Caballero sa mga tulisan apan iyaha kining gipugngan ug gitunol ang ilang mga cellphone nga duha ka Cherry Mobile ug usa ka Nokia ug ang iyang kolor pink nga pitaka nga dunay sulod nga P240.  Ang maong mga butang na-recover usab sa mga polis gikan sa patay’ng lawas ni Escare.  Si Remonde gipakita ni Tarucan sa hulagway ni Escare ug gitumbok sa maong biktima ang suspetsado nga maoy mitulis kanila. (/EIM) (BANAT NEWS)