CEBU, Philippines - Nakadawat na og direktiba ang Commission on Electon kon Comelec alang sa pagpatuman og lahugay sa mga election officers sa Sugbo ug tibuok Central Visayas ingon man lukop nasud alang sa nagsingabot nga eleksyon karong bulan sa Mayo.
Matud ni Comelec Provincial Supervisor Atty. Marco Lionel Castillano dihang nahinabi sa Banat News nga gipahibawo sila nga adunay lahugay sa tanang election officers sa kalungsoran ug dakbayan lukop nasud.
Apan dili pa nila kini dayon mapatuman hangtud nga di maabot ang Comelec en banc resolution nga maoy mag-semento sa maong kamandoan.
Matud ni Castillano nga karong petsa 13 ning bulana ipatuman ang lahugay.
Gibutyag ni Castillano nga siya sa iyang bahin adto kini madestino sa lalawigan sa Bohol isip provincial Comelec officer hangtud matapos ang eleksyon.
Ang lahugay gihimo aron pagsigurong dili magawngan sa mga politiko ang election officers sa nagkadaiyang mga lungsod ug aron usab malikay sa mga kontrobersya ug pasangil ang maong mga opisyal.
Giklaru ni Castillano nga lahi ang lahugay karon tungod kay mao kini labing una nga lukop nasud ang gi- revamp sa tanang election officers.
Kini mao unyay tubag sa mga kabalaka ug pagduda batok sa mga election officers nga gidudahan o gipasanginlang adunay gipaborang mga kandidato sa ilang mga dapit nga gikuptan. (/EIM) (BANAT NEWS)