Nabuthan sa granada niadtong Bag-ong Tuig namatay
BACOLOD CITY, Philippines — Namatay gyud ang usa sa tulo ka mga kalalakihang gilabay og granada atol sa pagsugat sa Bag-ong Tuig human sa pagkalandig sa tambalanan sud sa duha ka adlaw. Ang insidente nahitabo diha sa Brgy. Banago sa Bacolod City. Ang nakalas giilang si Bonifacio Tiangha, kinsa namatay niadtong adlaw nga Martes tungod sa kagrabe sa naangkon niining kadaot sa lawas gikan sa pagbuto sa granada. Naangol usab ang iyang mga paryente nga iyang kauban nianang mga tungora nga mao sila si Rene Remegio ug Jongjong Betua.
Sumala pa ni City Police director Sr. Supt. Ricardo de la Paz unang gika-report nga usa ka pillbox ang mibuto apan sa makuti nilang pagsusi nahibaw-an nga granada gyud ang mibuto.
“Our follow-up investigation confirmed that it was a grenade that exploded. We recovered the safety lever of the grenade. There are also two suspects,” matud pa ni dela Paz.
Giila ni De la Paz ang mga suspek mao sila si Ramy Poja, kinsa maoy gitumbok nga milabay sa granada ug kauban niining si Rogelio Acebedo Jr.,nga giingong nakit-ang nagdala og submachine gun. Ang duha nasuta nga mga nakaaway sa mga biktima kaniadto.
“They hold a grudge against the victims,” matud pang Dela Paz bahin sa posibleng motibo sa maong pagpabuto sa granada. Kasong murder ang giandam karon sa kapolisan batok sa mga suspek kinsa parehong miikyas human sa hitabo.
Samtang sa laing bahin, usa ka 20-anyos nga residente sa Bacolod ang nalumos sa Murcia sa Bago River kagahapon sa udto.
Patay na dihang nahaw-as ang lawas ni Johnrey Mendoza gikan sa maong suba diin kini ug iyang mga higala ug kabanay nag- picnic. Matud pa nga kauban sa namatay ang ig-agaw nga si Kimberly Mendoza, 23, ug higala nilang Hapon dihang nahitabo ang aksidente. (Danny Dangcalan/EIM) (BANAT NEWS)
- Latest
