CEBU, Philippines - Usa ka utility worker sa Cebu City Government ug duha ka junkshop workers natanggong karun sa Mambaling Police Station human nadakpan sa pagpangawat og mga scrap irons ug metals gamit ang government-owned vehicle kagahapon sa South Road Properties (SRP).
Matud sa police report, ang akusado mao sila si Danilo Abella, 33, gikan sa Bontores St., Brgy. Basak San Nicolas, Cebu City ug iyang duha ka kauban nga sila si Geovanni Villacora, 27 sa Tugas San Roque, Brgy. Mambaling, Cebu City ug Melchor Ortega, 50, sa Sitio Mangga sa maong barangay.
Si Abella nagtrabaho isip trip ticket maker sa General Services Office sa Cebu City samtang si Villacora ug Ortega parehong junkshop workers sa JM Junkshop nga nahimutang sa SRP access road sa Brgy. Mambaling, Cebu City.
Sumala sa police report, mga alas 2:50 sa kaadlawon kagahapon, si Ricky Sultan, 39, sa Cavaliers Security Agency ug Jerrymias Vallego, 33, sa Maya Security Agency, nga maoy mga security guards on duty sa SM SRP construction site, mitawag sa Mambaling Station ug ni-report nga aduna silay gidakop nga tulo ka mga akusado.
Ang tulo ka mga akusado nga gipanguluhan ni Abella, gidakop tungod sa pagpangawat sa 16 ka sako sa scrap irons, usa ka gas tank, usa ka oxygen tank ug usa ka oxygen acetylene cutter nga naay gauges, hose ug torch ug ang mga akusado nigamit sa boom truck nga gipanag-iya sa Cebu City Government nga nagtangag sa plate number SJM 960.
Si Phillip Zafra, ang chief of staff ni Mayor Michael Rama, nagkanayon nga una kining higayon nga adunay usa ka empleyado nga nihimo sa susama ka bug-at nga kalapasan. Matud pa ni Zafra awtomatiko nga gitangtang si Abella isip job order employee sa city government.
Si Zafra, nga mao pud ang nangulo sa City’s Civil Security Unit (CSU), nagkanayon nga dunay imbestigasyon sa hitabo.
Ang mga suspetsado ug ang mga ebidensiya sa nahisgutang kaso tua na sa kustodiya sa Police Station 11 for proper disposition. (Marigold P. Lebumfacil/EIM) (BANAT NEWS)