Garbo way respeto sa balaod — Frasco

CEBU, Philippines - Gihulagway ni  Manlalaban Christina Garcia Frasco, anak  ni Governor Gwendolyn  Garcia, nga si PRO-7 Regional Director Marcelino Garbo wala motamod sa  balaod   sa pagpagawas niini  og ultimatum pagpakanaog sa  suspendidong  gobernador gikan  sa Kapitolyo sa dili pa ang tuig 2013.

Si  Frasco   kinsa  usa  sa  mga abogado  sa iyang  suspendidong  inahan nagkanayon  nga usa ka iresponsabling pamahayag ang gihimo ni Garbo nga mogamit og puwersa pagpugos sa pagpakanaug sa gobernador.

Matud  pa  niya  nga  kining  tanan  luyo  sa kasayoran  ni Garbo nga nag-ung-ong  pa gihapon ang Temporary Restraining Order (TRO) sa gobernador   nga  iluwat sa Court of Appeals (CA).

Kini  human kuwestiyona sa gobernador ang matud  pa  usa  ka illegal order gikan sa presidente sa nasud sa pagsuspenso  kaniya  sa katungdanan.

Matud  pa  ni Frasco  nga gihimo  sa gobernador  ang  pagkuwestiyon  sa  maong  suspension  order  gumikan  sa kahuyang sa  basehanan niini  nga  nagpasabot  lamang  nga usa  ka  political harassment   batok kaniya ang  maong  lakang.

Sigun pa ni Manlalaban Frasco nga ang mga pamahayag ni Garbo tataw kaayo nga wala kini moila og balaod gikan sa CA  ug sa korte suprema.

Tungod  niini  mibahad  si  Frasco  nga  dili  ug  dili nila pakanaugon  ang  iyang  inahan  gikan  sa Kapitolyo  karong  adlawa  diin  sa higayong  mamugos  si  Garbo  pinaagi  sa paggamit  og  puwersa  sa kapolisan  mapugos  sila  sa pagpasaka  og  patung-patong   kaniya ngadto  sa hukmanan. - /WC (BANAT NEWS)