Taga Isla sa Bantayan nalipay sa 2-adlaw nga NBI satellite office

CEBU, Philippines - Dul-an sa 500 ka mga molupyo sa isla sa Bantayan ilabi na sa lungsod sa Madredijos ug Bantayan ang nakapahimulos sa duha ka adlaw nga temporaryong pag-opisina sa buhatan sa National Bureau of Investigation kon NBI didto sa maong isla sayo karung bulana.

Si konsehal Emie Matis Gabito ang Peso Manager sa lungsod sa Madridejos og si Mayor Salvador Sally Dela Fuente maoy nisuwat ngadto ni NBI director Eduardo Villarta alang sa pagpahigayon og mobile satellite office sa NBI sa ilang lungsod.

Kini aron mahatagan ug kahigayunan ang mga molupyo sa maong isla nga makalukat og NBI clearances nga dili na kinahanglan pa nga mobiyahi sa dakbayan sa Sugbo.

Tungod niini, duha ka adlaw nga nagbutang og temporaryong opisina sa NBI diha sa munisipyo sa Madredijos ug Bantayan niadtong petsa 9 ug petsa 10 niining bulana tibuok adlaw.

Matud ni Gabito nga kini maoy labing unang higayon nga nipahigayon og mobile office ang NBI sa isla nga gikalipay og maayo sa mga molupyo sa ilang lungsod ug tibuok isla nga nakapahimulos sa kahigayonan.

Dugang ni konsehal Gabito nga daghan pang mga molupyo sa isla ang nihangyo nila nga pabalikon ang NBI sayo karung bulana aron sila makalukat og NBI clearance.  - /EIM (BANAT NEWS)