CEBU, Philippines - Hugot nga monitoron sa Land Transportation Office (LTO) -7 ang mga pasaheroan ilabi na niadtong mga mag-overloading nunot ning pagdagsa sa bagang duot sa mga pasahero nga mamauli sa ilang probinsiya.
Sugod kagahapon hangtud na ugmang adlawa maoy napanglantawang dagsaon og mga pasahero ang mga terminal ug pantalan aron makabakasyon alang sa pagsugat sa Bag-ong Tuig.
Matud ni LTO-7 director Raul Aguilus, pabiling gipatuman na ang “Oplan Ligtas Biyahi sa Christmas” nga gisugdan sa pagpatuman niadtong naghinangat ang Pasko aron pagsiguro sa kaluwasan sa mga pasahero.
Sumala pa ni Aguilus gawas sa mga deputized agents nga ilang ipakatap sa mga bus terminals, PUV terminals ug mga malls nakig-alayon na usab sila sa mga lokal nga kagamhanan aron pagpanakop niadtong mag-overloading nga sakyanan.
Hinuon giklaro ni Aguilus nga gisuspenso una nila ang pagpatuman sa roadside random drug testing ug unya na sila sa Enero sa sunod tuig mobalik niini.
Sumala pa nga nagnihit karon ang ilang mga drug testing kits ug nagpaabot pa sila og dugang moabot nga supply.
Hinuon matud ni Aguilus, sugod niadtong Disyembre 21, upat na ka mga drayber sa bus ug PUJ ang nasakpang positibo sa paggamit sa ilegal nga drugas sa roadside drug testing nga ilang gilusad.
Ang nagpositibo nga drayber sa kinalit nga drug test temporaryong gikuhaan sa ilang lisensiya ug gimandoan nga mopaubos og drug rehabilitation.
Hinuon gipaabot pa ang resulta sa confirmatory test, apan kun mogawas nga positibo gyud sila sa paggamit og illegal drugs dili ibalik kanila ang prebilihiyong makamaneho og sakyanan kung di makompleto ang mga rekisitos sama sa drug rehabilitation ug pagbayad og multa.
Matud ni Aguilus nga karun lang tuiga moabot og 80 ka mga drayber sa pampublikong sakyanan ang nag-positibo sa mga kinalit nga surprise drug testing nila sa kadalanan.
Sa kinatibuk-an moabot na og kapin 200 ka mga drayber ang nagpositibo sa kinalit nga surprise drugtest sukad nila gilusad ang drug testing sa kadalanan sukad kini gisugdan niadtong 2009.
Gipasabot ni Aguilus nga tumong ug tuyo niini mao nga aron malimpyuhan gikan sa mga adik nga drayber ang mga pampublikong sakyanan nga makahatag og peligro sa mga sumasakay. (BANAT NEWS)