CEBU, Philippines - Hingpit nang nahimong usa ka balaod ang Sin Tax bill nga tawagon na karong Sin Tax Reform Act.
Kini human nga gilagdaan ni Presidente Benigno "Noynoy" Aquino III kagahapon sa buntag ang balaod human sa ratipikasyon sa duha ka kapulungan sa Kongreso niadtong Disyembre 11.
Sa iyang mensahe, gipasalamatan ni Aquino ang Kongreso sa pagpasar sa maong balaod human gilayon niya kini nasertipikahan nga urgent bill.
Partikular nga gipasalamatan sa Presidente si Senador Franklin Drilon nga maoy midawat sa Ways and Means Committee sa Senado human mikanaog sa pwesto ang kanhi chairman niini nga si Senador Ralph Recto. Matud pa ni Aquino nga sayong pinaskuhan alang sa mga Pilipino ang universal health programs nga mahatag gikan sa makuhang pundo sa Sin Tax Law.
Masaligon usab ang presidente nga pinaagi niining maong balaod, malikay na sa bisyo ang sobrang panigarilyo ug pag-inom og bino ang mga Filipino.
"Sa araw pong ito, nilagdaan natin ang isang batas na magsisilbing maagang pamasko sa milyun-milyong Pilipino, mga Pilipinong masasaklaw sa abot-kamay nang Universal Health Care program; mga Pilipinong makikinabang sa mga bagong klinika at ospital na mapupundohan at maipapatayo, mga Pilipinong maililihis sa bisyo ng paninigarilyo at labis na pag-inom" kini matud pa sa presidente.
Samtang gipasalig usab ni Aquino sa mga mag-uuma nga nagsalig sa pagpananom og tabako nga dili mawagtangan og panginabuhian karong hingpit na kining balaod.
"Wala po kayong dapat ikabahala. Ang benepisyong natatanggap ninyo dati ay hindi maglalaho, ang totoo nga po, sa amin pong pakiwari, lalaki pa iyan, habang tumitibay naman ang suporta sa inyo ng pamahalaan sa pamamagitan ng iba pang ayuda," dugang pa sa presidente. Base sa gi-aprubahang balaod sa bicameral conference committee, target sa gobyerno nga makahipos og P33.96 bilyones sa tuig 2013 gikan sa dugang-buhis sa sigarilyo ug bino. (BANAT NEWS)