CEBU, Philippines - Kapolisan naniid sa mga mangunguot diha ilawom sa flyover sa barangay Tabunok, dakbayan sa Talisay nga gikatahong kasagarang biktimahon mao ang mga estudyante.
Niining ulahi lang ang Talisay City Police Station nakadawat og mensahe gikan sa provincial headquarters kabahin sa maong isyu nga napatik sa column sa Banat News nga Mr. Barangay ni Jun Veliganio. Ang texter nagkanayon nga diha ubos sa flyover atbang sa usa ka kan-anan giingong magtapok ang mga mangunguot ug kasagarang biktimahon mga estudyante.
Si Inspector Rio Hugo Ipong sa pakighinabi niini sa Banat News nagkanayon nga nagbutang na sila og polis diha sa lugar nga naka-uniporme ug 24-oras usab nga may magpatrolyang mobile patrol ilawom sa flyover.
Ang flyover duol kaayo kini sa sitio Mananga nga giingong dagananan sa mga kawatan. Kahinumduman nga ubay-ubay na usab ang mga nabiktima sa mga pagpangawat ug pagpanulis diha sa Tabunok ug sagad sa mga gikatahapan anha manulod sa sitio Mananga sa ilang pag-ikyas.
Gibutyag ni Ipong nga niining ulahi lang duna silay nadakpan nga kawatan nga taga sitio Mananga II.
Matud usab ni Ipong nga gawas sa mga mangunguot gipanid-an usab nila ang mga tulisan nga magsakay og mga motorsiklo.
Matag gabii ug kadlawon magpahigayon sila og check point sa kadalanan sa siyudad aron mabantayan ang mga tulisan nga magsakay og mga motorsiklo. (BANAT NEWS)