PNP mohingusog pa sa kampanya batok pabuto
CEBU, Philippines - Tinguha karon sa kapulisan nga paubsan pa ang insidente sa pabuto sa Rehiyon 7 sa umaabot nga Bag-ong Tuig. Ning bag-ohay lang, ang Department of Health mipahibalong niabot og 77 ka tawo ang nabuthan sa pagsugat pa lang sa Pasko.
Si Supt. Rex Derilo, ang hepe sa Firearms, Explosives, Security Agencies, and Guards Supervision (FESAGS) 7, miingon nga mas gipahingusgan nila ang kampanya batok sa ilegal nga pabuto.
Kagahapon sa headquarters sa Police Regional Office 7, si Derilo mipresentar sa replika sa mga ginadiling pabuto pinaagi sa media para mapahibaw ang publiko kabahin niini.
Ang maong mga ginadiling pabuto mao ang gangnam bomb, Pacman, pla-pla, goodbye Philippines, super lolo, super thunder, ug piccolo.
Si Derilo miawhag sa publiko sa dili paggamit niining matanga sa mga pabuto ug i-report sa ilang buhatan ang makit-ang mogamit o mamaligya niini.
“They are prohibited firecrackers because they are oversized. Prohibited sad nang mga imported firecrackers, kanang wala mailhi sa Pilipinas,” matud pa niini.
Ang legal nga pabuto, matud pa kang Derilo, mao ang mga pabuto nga dunay burning time nga di muminos sa tulo ka segundos ug di sab molapas sa sais segundos.
Matud pang Derilo, ang mga legal nga pabuto mao ang baby rocket, bawang, pulling of string, paper caps, el Diablo, judah’s belt, kwitis, ug uban pang pabuto nga may pulburang di molapas sa 1/3rd sa kutsara.
Dinhi sa Sugbo, adunay gitaganang firecracker zones ang kagamhanan sa Sugbo ug Bureau of Fire Protection, sumala pang Derilo.
Kasong kalapasan sa Republic Act 7813 ang ipasaka sa mga maaktohang naggamit og ilegal nga pabuto. (BANAT NEWS)
- Latest
