CEBU, Philippines - Gihagit sa gisuspensong si Gob. Gwendolyn Garcia si Acting Gov. Agnes Magpale og debate labot sa financial status karon sa probinsiya.
Ang hagit maoy iyang tubag kabahin sa giingong pamahayag ni Magpale nga mahurot na ang pundo sa probinsya sa Sugbo kun bayran ang utang sa probinsiya nga moabot sa P200 milyones.
Matud pa nga si Magpale miingon nga P90.4 milyones na lamang ang total general fund sa probinsiya base sa cash report ni Provincial Treasurer Atty. Roy Salubre.
Apan base gihapon sa cash report ni Provincial Treasurer Atty. Roy Salubre, si Garcia miingon nga wala malakip og tan-aw ni Magpale ang total cash in bank nga mokabat og P387.4 milyones. Apil niini ang regular trust funds nga moabot sa kapin sa P204 milyones, trust fund sa MCBMB nga P4.4 million, P2.9 million nga trust fund sa CICCMB, P4.9 million trust fund sa ECCD, P1.9 million trust fund sa Pagcor, P6.5 million trust fund consolidated, P31 ka libong trust fund sa DOE ug P9.8 million nga trust fund sa Vegetable Highway. Gipasabot sa gobernador nga ang mga pundo sa mga proyekto nga bayranon karon nga giingon ni Magpale adto kuhaon sa trust fund. Apan gikuha lamang una kini ngadto sa General fund kay dali ra man ang pagpagawas sa pundo alang sa dali nga pagpatuman sa proyekto ug i-revert lang unya ang trust fund nga anaa sa bangko ngadto na sa general fund.
Gitumbok ni Garcia nga giproseso na ang maong revert sa maong pundo uban sa pag-usisa sa mga auditors sa Kapitolyo ug labaw sa tanan wala giwaldas ang pundo sa probinsiya. (BANAT NEWS)