Wala ipatuman ang martial law sa lalawigan sa Sugbo – Garbo

CEBU, Philippines - Dul-an  sa  200 ka   mga   opisyal  sa kapolisan ang gidestino  karon   sa Kapitolyo  sa   pagpatuman sa maximum tolerance   sa eksena  nga  giisip  sa  mga supporter  sa suspendidong  gobernador  nga sama  sa martial law. 

Apan  gisalikway  ni Police Regional Office (PRO-7) Regional Director Chief Supt. Marcelo Garbo  ang maong  negatibong hunahuna, ug mitataw  nga   wala  sila  magpatuman  og  martial law.

Kini  tungod kay   matud pa ni Garbo nga susama   ra sa naandan   nga ilang  gihimo  nga  kapkapan  sa lawas  ug kuhaan  usab  og  identification (ID)   ang matag  tawo  nga  mosulod sa Kapitolyo.

Gipasabot   ni Garbo nga igo lang gayud silang nagbantay  sa posibling kadaot nga mahitabo sa palibot sa  Kapilyo  ilabi na kun ang supporter ni  sa suspendidong  gobernador magdasok  ug malupig sila  sa gidaghanon    ug  mahimutang   sila sa dakong  peligro.

Apan sa pagbisita ni Bise-Presidente Jejomar Binay kagahapon sa buntag nabantayan  sa  kadaghanan  nga  wala  kini maka-uyon sa kadaghan sa kapolisan nga  nagbantay  sa Kapitolyo.

Tungod  kay nasaksihan  man  niini  nga  didto  ra  gawas  ang  mga supporter    sa  suspendido  nga  si  Governor Gwendolyn Garcia, iyang  gihangyo  ang kapolisan   nga pasudlon  sila sa   Kapitolyo.

Samtang sa laing bahin, gipanghimakak   ni  Garbo    ang giingong  may 20  ka sundawo  ang  escort ni  Binay tungod  kay  siya  may  naghatag  og  polis  nga  mo-escort  sa  bise  presidente.

Sa samang  higayon  gibutyag  ni  Garbo  nga  kining  suliran  karon  sa Kapitolyo  nakaapektar  pag-ayo  sa ilang  pagbantay  sa misa de gallo.

Busa  tungod  kay  usa  kini  ka dakong  labad  sa iyang  ulo,  naningkamot  siya  nga  masulbad  kining maong  problema  sa   dali  nga  panahon.  (BANAT NEWS)