CEBU, Philippines - Namatay ang usa ka negosyante human kini pusila sa wala hiilhing kriminal apan napusilan usab patay sa usa ka polis ang maong kriminal didto duol sa GD Gas Station sa Poblacion 2 sa siyudad sa Carcar kagahapon sa alas 8:45 sa buntag.
Ang unang namatay mao si Mario Gilbert Alejado, 50, minyo, nga taga Sitio Cabuntan, Bolinawan, Carcar, usa ka negosyante og kahoy.
Samtang ang mipatay kaniya wala hiilhi hangtud sa pagsulat ning balita kinsa namatay usab human pusila sa usa ka off duty nga polis nga si Insp. William Alicaba,hingkod, nga nagpuyo sa maong lugar apan nadestino dinhi sa dakbayan sa Sugbo.
Si PO2 Abelardo Beton sa Carcar City Police Station mibutyag sa Banat News nga ang biktima nagpalit og animal feeds sa tindahan og feeds sa maong dapit dihang ang kriminal kinsa nagsakay og motorsiklo nga Yamaha Vega nga walay plate number kalit lang mihunong sa atbang sa tindahan sa animal feeds.
Ang biktima kinsa mosakay na unta sa iyang multicab human makapalit og feeds kalit nga giduol sa kriminal ug walay daghang estorya gipusil ang walang bahin sa dughan sa naulahi nga maoy hinungdan sa hinanaling kamatayon niini.
Sa dihang nakita sa kriminal nga mibay-ad na sa yuta ang biktima, buot na unta kining mosakay sa iyang motorsiklo aron moikyas dihang gipusil usab kini ni Insp. Alicaba kinsa didto sa maong lugar kay may gipalit usab siya sa usa sa mga tindahan didto.
Nalup-og usab dayon ang kriminal gumikan sa samad pinusilan niini sa iyang ilok. Si Alejado ug ang mipatay kaniya, pulos gisuway paghatud ngadto sa Carcar City District Hospital apan silang duha gideklarar nga dead on arrival.
Ang kapolisan nakapunit og 9mm pistol nga iya sa kriminal nga may usa ka magazine uban sa 7 ka buhing bala ug laing .380 calibre nga may usa usab ka magazine nga dunay 14 ka buhing bala didto sa crime scene.
Lakip sa napunitan sa mga polis gikan sa ubos sa motor sa kriminal mao ang ATM card ug ang hulagway niini. Ang kapolisan padayon pa karon sa ilang imbistigasyon pagtino sa motibo sa krimen ug sentro sa ilang gisubay mao ang personal nga bangi tali ni Alejado ug sa mipatay kaniya.
Ipaubos pa usab sa pagsukit- sukit si Insp. Alicaba sa maong hitabo. (/WC) (BANAT NEWS)