Bonus sa mga kawani sa Kapitolyo ihatag gyud

CEBU, Philippines -  Atol sa Christmas Party nga puno pa og kalibog ug kabalaka ang mga empleyado gipahibalo ni acting Governor Agnes Magpale nga makadawat ang mga kawani sa tag P30 mil nga bonus sulod ning buwana.

Matud pa ni Magpale nga nalangan lang kini tungod sa mga panghitabo sa Kapitolyo ug bag-ohay lang natuki sa special session sa Hunta Probinsyal kagahapon sa hapon ang maong hisgutanan, hinuon napasar kini dayon kagahapon sa hapon.

Tungod sa maong pahibalo nahugyaw ang mga empleyado. Napanglantawang walay mobabag sa desisyon sa Hunta Probinsyal bahin sa maong bonus.

Samtang sa laing bahin,  sa labing unang higayon, nabahin ang mga kawani sa Kapitolyo ug dayag kining nakita sa gihimong duha ka buwag nga Santos nga Misa kagahapon, ang pikas nga misa gihimo sa kampo ug dumadapig ni acting  Governor Agnes Magpale ug ang usa sa grupo sa gisuspensong si governor Gwendolyn Garcia.

Kung kaniadto sa social hall gyud himuon ang Santos nga Misa nga tambungan ni Garcia, kagahapon sa buntag, didto kini gihimo sulod sa iyang buhatan, kauban ni Garcia ang iyang mga staff ug kabanay nga naglakip sa iyang amahang si kanhi gobernador ug karon kongresista Pablo Garcia.

Si Garcia pabiling nagmagahi sa pagsanong sa suspension order sa Department of Interior and Local Government tungod sa pagtuong ilegal kini ug depektoso.

Sa report sa Aksyon Bisaya News 5, walay mga department heads ug mga empleyado sa provincial capitol ang nakauban ni Garcia sa Santos nga Misa, bugtong mga kabanay ug suod nga higala niini ang mitambong sa misa sa executive building.

Sa homiliya ni Fr. Dan de los Angeles, gipasabot niini nga ang tanang tawo moagi gyud og kalisdanan aron pagsukod sa ilang pagtuo ngadto sa Ginoo. Wa kapugngi sa gobernadora nga makaluha atol sa pagpangalawat ug mas nigrabe pa ang emosyon pagkahuman sa misa sa dihang nanghilak ang mga supporters niini nga tagsatagsang migakos kaniya.

Human sa Santos nga Misa mibalik sa iyang buhatan kauban ang iyang amahan nga si Kongresista Pablo Garcia ug igsuon nga si Kongresista Pablo John.

Migawas si Pabling alang sa usa ka press conference ug gipadayag niini nga depektoso gyud ang suspension order sa iyang anak mao nga di kini angayang mukanaog sa katungdanan. Miangkon ang beteranong politiko nga si Pabling, nga nasakitan siya sa gidangatan sa iyang anak.

Kagahapon sa hapon , mihimo usab og kaugalingong Santos nga Misa si acting Governor Agnes Magpale kauban ang mga department heads ug mga empleyado sa Kapitolyo.  (BANAT NEWS)