CEBU, Philippines - Napaig ang 9- anyos nga batang lalaki ug napaso usab ang kalawasan sa amahan niini dihang ang kongkretong duha ka andana nga panimalay nga ilang gipuy-an sa dalan Damataga, sitio Langob, barangay Poblacion, dakbayan sa Lapulapu ang gilamoy sa dakong sunog sa miaging gabii.
Ang namatay mao si Chilmer Mangubat, 9, anak ni Mark Anthony Mangubat, kinsa napaso sa iyang kalawasan apan anaa sa luwas nga kahimtang.
Si SFO1 Romeo Villagano sa Bureau of Fire Protection (BFP) sa dakbayan sa Lapulapu nga nahinabi sa Banat News miingon nga ang nasunog nga panimalay gipanag-iya sa pamilyang Mangubat.
Ang maong sunog gipaubos ni Lapulapu City Fire Marshall Oscar Mayol sa second alarm ug nakontrolar paglabay lamang sa kwatro minutos.
Gibanabanang mokabat sa P80,000 ang gibiling danyos niini ug ang nakalas nga bata.
Matud pa niya ang gidagkotang katol maoy ilang gituohan nga nakaingon sa sunog nga gibutang sa tiilan nga bahin ug natumba ug nasilaob ngadto sa habol ug mikatap sa balay.
Midako na ang kalayo una pa nakabantay ang mga tagbalay ug naglumba og panggawas. Lakip sa diha sa balay atol sa hitabo sila si Sherryll Abing ug Retchie Abing.
Dugang pa niya nga si Mark Anthony nakadagan sa paggawas sa ilang panimalay apan natagakan sa nagbagang mga debris nga nakaingon sa pagkapaso niini.
Dihang nakagawas na ang mga tagbalay anha pa nila namatikding wala makagawas si Chilmer nga ilang gituohang nakatulog. (/EIM) (BANAT NEWS)