CEBU, Philippines - Nahanaw ang gibanabanang moabot P50 mil nga cash gikan sa donation box sa administration department sa Visayas Community Medical Center nga nadiskubrehan kagahapon pa sa hapon. Matud sa administrador sa maong tambalanan nga si Rev. Mequias Camba Jr. sa report sa News5 pugsanon nga giguba sa wala pa mailhing kawatan o mga kawatan ang exhaust fan ug gikan didto misulod sa maong buhatan.
Human niini giguba ang donation box nga dunay sud P50 mil, gikuha usab ang usa ka laptop nga nagkantidad og P28 mil ug subwoofer nga nagkantidad og P5 mil.
Ang mga sakop sa Scene of the Crime Operation inabagan sa Theft and Robbery Section sa Cebu City Police Office padayon pang nag-imbestigar sa maong kaso.
Gikuhaan na usab tagsatagsa sa mga polis og fingerprints ang dul-an kwatro siyentos ka mga empleyado sa maong tambalanan samtang gikuhaan usab og latent prints ang donation box ug uban pang parte sa buhatan nga posibleng nakuptan sa mga kawatan. (BANAT NEWS)