2 ka Koreano angol sa disgrasya

CEBU, Philippines -  Duha ka Koreano  ang naangol  human  madasmag  sa poste  sa kuryente  ang  ilang gisakyang  awto didto sa AS Fortuna sa barangay  Banilad dakbayan sa Mandaue kagahapon sa kaadlawon.

Ang mga biktima mao si Bai Kyun Din, 34, minyo, ug Hung Dong Yang, 34,  pulos   mga Korean national nga kasamtangang nagpuyo sa Silverhills Subdivision sa Barangay  Talamban dakbayan sa Sugbo.

Base sa imbestigasyon sa kapolisan sa Mandaue City Police Office (MCPO) nasayran   nga  sa  mga alas 12:27 kagahapon sa kaadlawon   nakurat  ang  mga  molupyo  sa  dapit  nga  nahitaboan  dihang  mipaka  og  kalit  ang  poste  sa kuryente  sa ilang  palibot.

Dihang  ilang  gisusi  ilang nakita  ang  usa  ka awto  nga  maayong  pagkaguba sa simod  apan  wala  makatumba  sa poste apan giapil pagdaro  niini  ang  tubo  sa tubig  nga nahimutang  sa kilid  sa  maong  poste. Diha-diha  ang  duha  ka Koreanong  nagkadugo na  gumikan  sa  mga  samad  sa ilang  lawas  gisakwat  sa  mga  molupyo  ug  gihatud  ngadto  sa tambalanan.

Nasayran  sa kapolisan  nga  paingon na  untang  mamauli  sa ilang  gipuy-an  ang  mga  biktima  dihang nakasugat  kini  og  disgrasya.

Matud  pa  sa kapolisan  nga ila pang palawman  ang  imbistigasyon   pagsuta  kundi ba hubog  ang  Koreano  nga  nagmaneho  sa ilang  sakyanan.( WC)(BANAT NEWS)