14-anyos miangkong nakapatay na og pito ka tawo

CEBU, Philippines - Usa ka katorse anyos nga batang lalaki nga  gidudahang sakop sa dakong sindikato sa kaulohan ug nangangkong nakapatay na usab og pito ka tawo ang nadakpan sa kapolisan kagahapon sa buntag sa ilang panimalay sa sitio Manggahan, A. Lopez barangay Carreta.Ang maong 14-anyos nailhan pinaagi sa Closed Circuit Television camera samtang nangawat og usa ka motorsiklo.

Gani, ang hepe sa kapolisan sa Theft and Robbery Section (TRS) Inspector Rolando Pinili mihulagway nga ubay-ubay na nga motorsiklo nga gipangawat ang gidudahang binuhatan sa maong menor de edad.

Matud pa ni Pinili nga ila karun nga giproblema mao nga menor de edad pa ang ilang nasikop ug naglisod sila sa pagpasaka niini og kaso.

Nagpatabang na sila karon sa buhatan sa Department of Social Welfare and Development aron ma-asess kun mahimo bang mapasakaan kini og kaso.

Ang kapolisan nagkanayon nga gigamit na sa mga dagkong sindikato ang mga bata tungod sa kasamtangang balaod nga Juvenile Justice Law nga diin ang ubos sa edad nga kinse anyos walay criminal liability tungod sa ilang pangidaron.

Dugang pa ni Pinili nga sa ilang nakuhang impormasyon mao nga pito na ka mga motorsiklo ang nakawat sa maong menor de edad ug ang uban niini dinhi ra nahitabo sa dakbayan sa Sugbo.

Samtang ang menor de edad usab, mipadayag nga iyang nabuhat ang maong krimen tungod kay aduna siyay gikinahanglan nga bayrang utang nga kun dili usab niya mabayran siya man ang mabugtuan sa kinabuhi.

“Kung di ko mobayad sad, patay man sab ko,”matud pa sa menor de edad kinsa miangkon usab nga sakop siya sa banggiitan apan na-neutralized na nga Dominguez Robbery Group sa dihang aktibo pa ang grupo sa kaulohan.

Dugang pag-angkon sa menor de edad mao nga gawas sa pito ka motorsiklo nga iyang nakawat pito usab ka mga tawo ang iyang napatay.

Wala hinuoy polis nga mikompirmar sa pangangkon sa maong batan-on kabahin sa mga napatay niini.( EIM)(BANAT NEWS)