CEBU, Philippines - Gitugotan na sugod kagahapon sa buntag ang pagpamaligya og mga pabuto sa dakbayan sa Lapulapu apan didto lamang sa kadalanan sa mga Barangay Babag, Calawisan ug Canjulao, sa maong dakbayan.
Si Lapulapu City Mayor Paz Radaza nagkanayon nga gawas sa tulo ka barangay wala na siya mohatag og permiso sa ubang mga negosyante sa ubang barangay kinsa nagtinguha usab unta nga makapamaligya og pabuto sa ilang tagsa-tagsa ka lugar.
Usa sa katarungan ni Radaza sa pagpili niya sa tulo ka barangay mao ang kaluwas ning mga lugara gikan sa peligro sa sunog.
Kini tungod kay gawas nga menus og mga balay, sayon ra usab kaayo sa mga bombero ang pagbadhas-badhas sa maong lugar aron pagpaniid bahin sa sunog.
Bahin sa mga trabahante sa mga pabrika og pabuto sa maong mga lugar, gipasusi usab ni Mayor Radaza kun wala na bay mga menor de edad nga gipatrabaho sa mga himoanan og pabuto.
Samtang nanghinaot usab ang mga namaligyaay og pabuto nga modako ang ilang kinitaan karong tuiga aron makabawi sila sa ilang dagkong alakanse sa miaging tuig. (Bong Soriano/WC) (BANAT NEWS)